ரஷ்யாவிடம் இருந்து கச்சா எண்ணெய் மற்றும் இயற்கை எரிவாயு இறக்குமதி செய்யும் நாடுகளுக்கு எதிராக கடுமையான வர்த்தக நடவடிக்கைகளை மேற்கொள்ள அமெரிக்க அதிபர் டொனால்ட் டிரம்புக்கு அதிகாரம் வழங்கும் மசோதாவை அமெரிக்க பிரதிநிதிகள் சபை நிறைவேற்றியுள்ளது.

ரஷ்யா மற்றும் ஈரானுக்கு எதிரான பொருளாதாரத் தடைகளை வலுப்படுத்தும் வகையில் உருவாக்கப்பட்ட இந்த மசோதா, செப்டம்பர் 16-ஆம் தேதி 262-159 வாக்குகள் என்ற கணக்கில் பிரதிநிதிகள் சபையில் நிறைவேறியது. இதற்கு முன்பாக அமெரிக்க செனட் சபையிலும் இந்த மசோதா 86-11 வாக்குகளுடன் ஒப்புதல் பெற்றிருந்தது.இனி மசோதா அதிபர் டொனால்ட் டிரம்பின் ஒப்புதலுக்காக அனுப்பப்பட்டுள்ளது.

இந்தியாவுக்கு என்ன பாதிப்பு?

ரஷ்யாவிடம் இருந்து அதிக அளவில் கச்சா எண்ணெய் இறக்குமதி செய்யும் நாடுகளில் இந்தியாவும் முக்கிய இடத்தில் உள்ளது. இதனால், புதிய மசோதாவின் வர்த்தக நடவடிக்கைகள் இந்தியாவையும் பாதிக்கக்கூடும் என்ற கவனம் ஏற்பட்டுள்ளது.

ஆனால், இந்தியாவுக்கு உடனடியாக 100 சதவீத வரி விதிக்கப்படும் என்று மசோதா கூறவில்லை. ரஷ்ய எண்ணெய் அல்லது இயற்கை எரிவாயுவை அதிக அளவில் வாங்கும் நாடுகளுக்கு, குறிப்பிட்ட நிபந்தனைகளின் அடிப்படையில் 100 சதவீதம் வரை கூடுதல் வரி விதிக்க அதிபருக்கு அதிகாரம் வழங்கப்படுவதே மசோதாவின் முக்கிய அம்சமாகும்.

இதனால், தற்போது இந்தியப் பொருட்களுக்கு 100 சதவீத வரி அமல்படுத்தப்பட்டதாகக் கருத முடியாது. மாறாக, எதிர்காலத்தில் இந்தியாவுக்கு எதிராக கூடுதல் வர்த்தக நடவடிக்கை எடுக்க அமெரிக்க நிர்வாகத்துக்கு இந்த மசோதா வழிவகுக்கிறது.

ரஷ்யாவின் எண்ணெய் வருவாயை கட்டுப்படுத்த முயற்சி:

ரஷ்யாவின் பொருளாதாரத்தின் மீது அழுத்தத்தை அதிகரிப்பதற்காக அந்நாட்டின் எரிசக்தி மற்றும் பாதுகாப்புத் துறைகளை குறிவைக்கும் நடவடிக்கைகள் மசோதாவில் இடம்பெற்றுள்ளன.

மேலும், தற்போதைய பொருளாதாரத் தடைகளைத் தவிர்த்து ரஷ்ய எண்ணெயை சர்வதேச சந்தைகளுக்கு கொண்டு செல்வதாகக் கூறப்படும் மறைமுக எண்ணெய் கப்பல் வலையமைப்புகளுக்கும் கட்டுப்பாடுகளை விதிக்கும் நடவடிக்கைகள் இதில் இடம்பெற்றுள்ளன.

இதன் மூலம் ரஷ்யாவின் எண்ணெய் வருவாயை குறைத்து, அந்நாட்டின் பொருளாதார நடவடிக்கைகளுக்கு கூடுதல் அழுத்தம் ஏற்படுத்த அமெரிக்கா முயற்சிக்கிறது.

ரஷ்யாவுக்கு எதிரான நடவடிக்கைகளுடன், ஈரான் தொடர்பான பொருளாதாரத் தடைகளையும் நீட்டிக்கும் விதிகள் மசோதாவில் இடம்பெற்றுள்ளன.இதன் மூலம் இரு நாடுகளின் முக்கிய பொருளாதார நடவடிக்கைகளையும் கட்டுப்படுத்தும் வகையில் அமெரிக்காவின் தடைகள் மேலும் விரிவடையக்கூடும்.

இரு கட்சிகளின் ஆதரவு:

மசோதாவுக்கு அமெரிக்க பிரதிநிதிகள் சபையில் குடியரசுக் கட்சி மற்றும் ஜனநாயகக் கட்சி உறுப்பினர்களிடமிருந்தும் ஆதரவு கிடைத்தது.58 ஜனநாயகக் கட்சி உறுப்பினர்கள் மசோதாவுக்கு ஆதரவாக வாக்களித்தனர். அதே நேரத்தில், அதிபருக்கு பரந்த அளவில் வரி விதிக்கும் அதிகாரம் வழங்கப்படுவது குறித்து சில உறுப்பினர்கள் கவலை தெரிவித்தனர்.

இந்த அதிகாரம் அமெரிக்க நிர்வாகத்திற்கு வர்த்தகக் கொள்கையில் அதிகப்படியான முடிவெடுக்கும் அதிகாரத்தை வழங்கக்கூடும் என்றும், அமெரிக்காவின் கூட்டணி நாடுகள் மற்றும் முக்கிய வர்த்தக நாடுகளையும் பாதிக்க வாய்ப்புள்ளதாகவும் விமர்சனங்கள் முன்வைக்கப்பட்டன.

பிரதிநிதிகள் சபையின் ஒப்புதலைத் தொடர்ந்து, மசோதா தற்போது அதிபர் டிரம்பின் பரிசீலனையில் உள்ளது. அவர் கையெழுத்திட்டு சட்டமாக்கினால், ரஷ்ய எரிசக்தியை தொடர்ந்து வாங்கும் தகுதியான நாடுகளுக்கு எதிராக கூடுதல் வரி விதிக்கும் அதிகாரத்தை அமெரிக்க நிர்வாகம் பயன்படுத்த முடியும்.

இந்தியாவைப் பொறுத்தவரை, அமெரிக்க நிர்வாகம் இந்த அதிகாரத்தை பயன்படுத்துமா, அப்படிப் பயன்படுத்தினால் இந்தியப் பொருட்களுக்கு எவ்வளவு வரி விதிக்கப்படும் என்பதே அடுத்த முக்கிய கேள்வியாக உள்ளது.இந்திய வெளியுறவு அமைச்சகம் இந்த விவகாரத்தில் ஏற்பட்டுள்ள முன்னேற்றங்களை தொடர்ந்து கண்காணித்து வருவதாகவும், அமெரிக்க அதிகாரிகளுடன் இதுதொடர்பாக பேச்சுவார்த்தைகள் நடைபெற்றுள்ளதாகவும் தெரிவித்துள்ளது. அதேவேளையில், இந்தியாவின் எரிசக்தி பாதுகாப்பு மற்றும் பொருளாதார நலன்கள் முக்கியமானவை என்றும் வலியுறுத்தப்பட்டுள்ளது.