தமிழகத்தில் பெண்கள் மற்றும் திருநங்கையர்களுக்கான இலவச பேருந்து பயண வசதியை விரிவுபடுத்தும் ‘வெற்றி பயணம்’ திட்டத்தை முதல்வர் சி. ஜோசப் விஜய் வெள்ளிக்கிழமை தொடங்கி வைத்தார்.சென்னை கோயம்பேடு பேருந்து நிலையத்தில் நடைபெற்ற நிகழ்ச்சியில் திட்டத்தை தொடங்கி வைத்த முதல்வர், அரசுப் பேருந்தில் பயணம் செய்த பெண்களுக்கு இலவச பயணச்சீட்டுகளை நேரடியாக வழங்கினார்.
எந்தெந்த பேருந்துகளில் இலவச பயணம்?
புதிய விரிவாக்கத்தின் மூலம் நகரங்கள் மற்றும் நகர்ப்புறங்களில் இயக்கப்படும் எக்ஸ்பிரஸ், லிமிடெட் ஸ்டாப் சர்வீஸ் (LSS), டீலக்ஸ் பேருந்துகளிலும் பெண்கள் இலவசமாகப் பயணிக்க முடியும்.
இதுதவிர, மாநகரங்களுக்கு இடையேயான சாதாரண பேருந்துகள் மற்றும் 40 கி.மீ.க்கு மேல் மலைப்பகுதிகளில் இயக்கப்படும் காட் ஆர்டினரி பேருந்துகளும் திட்டத்தின் கீழ் கொண்டுவரப்பட்டுள்ளன.முன்னதாக செயல்படுத்தப்பட்ட ‘விடியல் பயணம்’ திட்டத்தின் மூலம் பெண்களுக்கு குறிப்பிட்ட சாதாரண நகர மற்றும் நகர்ப்புற பேருந்துகளில் இலவச பயணம் வழங்கப்பட்டு வந்தது.
84 லட்சத்துக்கும் மேற்பட்ட பெண்களுக்கு பயன்:
அரசின் கணக்கீட்டின்படி, விரிவுபடுத்தப்பட்ட திட்டத்தின் மூலம் தினமும் சுமார் 84.32 லட்சம் பெண்கள் பயன்பெறுவார்கள் என எதிர்பார்க்கப்படுகிறது.
மாநிலத்தின் ஏழு போக்குவரத்துக் கழகங்களின் கீழ் இயக்கப்படும் 12,692 பேருந்துகள் இத்திட்டத்தில் இணைக்கப்பட்டுள்ளன. இது திட்டமிடப்பட்ட மொத்த பேருந்து இயக்கத்தில் சுமார் 69 சதவீதம் ஆகும்.
இந்த இலவச பயண வசதியைப் பெற வருமான வரம்பு கிடையாது. அதேபோல், ஒரு நாளில் அல்லது குறிப்பிட்ட காலத்தில் மேற்கொள்ளும் பயணங்களுக்கும் எண்ணிக்கை வரம்பு இல்லை என தெரிவிக்கப்பட்டுள்ளது. இருப்பினும், SETC பேருந்துகள் இத்திட்டத்தில் சேர்க்கப்படவில்லை.
ஆண்டுக்கு ₹6,000 கோடி செலவு:
விரிவுபடுத்தப்பட்ட ‘வெற்றி பயணம்’ திட்டத்தை செயல்படுத்த ஆண்டுக்கு சுமார் ₹6,000 கோடி செலவாகும் என மதிப்பிடப்பட்டுள்ளது.பெண்கள் கல்வி, வேலைவாய்ப்பு, மருத்துவ சிகிச்சை உள்ளிட்ட அத்தியாவசிய தேவைகளுக்காக பொதுப் போக்குவரத்தை எளிதாக பயன்படுத்துவதற்கு இந்தத் திட்டம் உதவும் என தமிழக அரசு தெரிவித்துள்ளது.
