‘100% முழுக் கோதுமை பிரெட்’ என விளம்பரப்படுத்திய விவகாரத்தில், பிரிட்டானியா இண்டஸ்ட்ரீஸ் நிறுவனத்துக்கு மத்திய நுகர்வோர் பாதுகாப்பு ஆணையம் (CCPA) ரூ.1 லட்சம் அபராதம் விதித்துள்ளது. தயாரிப்பின் மூலப்பொருட்கள் குறித்த விளம்பரக் கூற்று நுகர்வோரைத் தவறாக வழிநடத்தக்கூடும் எனக் கூறி இந்த நடவடிக்கை எடுக்கப்பட்டுள்ளது.
62% மட்டுமே முழுக் கோதுமை மாவு:
ஆணையத்தின் விசாரணையில், சம்பந்தப்பட்ட பிரெட்டில் முழுக் கோதுமை மாவு 62% மட்டுமே இருந்தது தெரியவந்தது. மீதமுள்ள 38% அளவில் தண்ணீர், ஈஸ்ட், கோதுமைத் தவிடு உள்ளிட்ட பிற பொருட்கள் இடம்பெற்றிருந்தன.
உணவுப் பாதுகாப்பு விதிகளின்படி, ‘Whole Wheat Bread’ என வகைப்படுத்தப்படும் பிரெட்டில் பயன்படுத்தப்படும் மாவில் முழுக் கோதுமை மாவு குறைந்தபட்சம் 75% இருக்க வேண்டும். இந்த நிலையில், தயாரிப்பை ‘100% முழுக் கோதுமை பிரெட்’ என விளம்பரப்படுத்தியது குறித்து ஆணையம் கேள்வி எழுப்பியது.
விளம்பரங்களை நிறுத்த உத்தரவு:
‘100%’ என்ற சொல் தயாரிப்பின் முழுக் கலவையும் முழுக் கோதுமை மாவால் ஆனது என்ற எண்ணத்தை நுகர்வோருக்கு ஏற்படுத்துவதாக ஆணையம் தெரிவித்தது. இந்த விவகாரத்தில் பிரிட்டானியா நிறுவனத்தின் விளம்பரங்கள் தவறானவை எனக் கருதிய ஆணையம், நுகர்வோர் பாதுகாப்புச் சட்டம், 2019-ன் கீழ் ரூ.1 லட்சம் அபராதம் விதித்தது.
மேலும், சம்பந்தப்பட்ட விளம்பரங்களை அனைத்து ஊடகங்களிலிருந்தும் உடனடியாக நிறுத்தவும், உத்தரவுக்கு இணங்கியதற்கான அறிக்கையை 15 நாட்களுக்குள் சமர்ப்பிக்கவும் நிறுவனத்துக்கு உத்தரவிடப்பட்டுள்ளது.
உணவுப் பொருட்களின் மூலப்பொருட்கள் மற்றும் தரம் குறித்த விளம்பரங்கள் துல்லியமாக இருக்க வேண்டும் என்பதை இந்த நடவடிக்கை வலியுறுத்துகிறது.
