2026 ஆசிய விளையாட்டுப் போட்டியின் ஆடவர் கிரிக்கெட் இறுதிப்போட்டியில் இந்தியா இன்று பாகிஸ்தானை 19 ரன்கள் வித்தியாசத்தில் வீழ்த்தி தங்கப் பதக்கத்தை வென்றது.கொரோகி ஸ்போர்ட்ஸ் பூங்காவில் நடைபெற்ற போட்டியில் டாஸ் வென்ற இந்தியா முதலில் பேட்டிங் செய்தது. 20 ஓவர்கள் முடிவில் இந்தியா 6 விக்கெட் இழப்புக்கு 211 ரன்கள் குவித்தது.

அபிஷேக்கின் அதிரடி தொடக்கம்:

இந்திய தொடக்க வீரர் அபிஷேக் சர்மா பாகிஸ்தான் பந்துவீச்சை தொடக்கம் முதலே தாக்கினார். 20 பந்துகளில் அரைசதம் அடித்த அவர், 28 பந்துகளில் 61 ரன்கள் எடுத்தார். இதில் 7 சிக்சர்களும் 3 பவுண்டரிகளும் அடங்கும்.இஷான் கிஷன் 20 ரன்களும், ஸ்ரேயாஸ் ஐயர் 21 ரன்களும் சேர்த்தனர்.

திலக் வர்மா அரைசதம்:

இறுதிக்கட்டத்தில் திலக் வர்மா இந்தியாவின் ஸ்கோரை உயர்த்தினார். அவர் 22 பந்துகளில் ஆட்டமிழக்காமல் 51 ரன்கள் எடுத்தார்.சிவம் துபே 15 பந்துகளில் 27 ரன்கள் சேர்த்ததால் இந்தியா 211 ரன்களை எட்டியது.

நவாஸின் அதிரடி ஆட்டம்:

212 ரன்கள் இலக்குடன் களமிறங்கிய பாகிஸ்தான் அணிக்கு ஹசன் நவாஸ் நம்பிக்கை அளித்தார். அவர் 51 பந்துகளில் 96 ரன்கள் விளாசினார். சைம் அயூப் 29 ரன்கள் எடுத்தார்.

இருப்பினும், இந்திய பந்துவீச்சாளர்கள் தொடர்ந்து விக்கெட்டுகளை கைப்பற்றி பாகிஸ்தானின் இலக்கு பயணத்தை கட்டுப்படுத்தினர்.

இந்தியாவின் தங்க வேட்டை:

கடைசி ஓவரில் பாகிஸ்தானுக்கு 33 ரன்கள் தேவைப்பட்ட நிலையில், இந்தியா வெற்றியை உறுதி செய்தது. பாகிஸ்தான் 20 ஓவர்களில் 6 விக்கெட்டுக்கு 192 ரன்கள் எடுத்தது.இந்திய அணியில் அக்சர் படேல் மற்றும் வாஷிங்டன் சுந்தர் தலா 2 விக்கெட்டுகள் வீழ்த்தினர்.

இந்த வெற்றியின் மூலம் ஆசிய விளையாட்டில் ஆடவர் கிரிக்கெட்டில் இந்தியா தொடர்ச்சியாக இரண்டாவது தங்கப் பதக்கத்தை வென்றுள்ளது. 2023 ஹாங்சோ போட்டியிலும் இந்தியா தங்கம் வென்றிருந்தது. 2026 போட்டியில் மகளிர் அணியும் தங்கம் வென்றுள்ளதால், இரு கிரிக்கெட் பிரிவுகளிலும் இந்தியா முதலிடம் பிடித்துள்ளது.