தமிழகத்தில் மழைநீர் சேகரிப்பை ஊக்குவிக்கவும், நிலத்தடி நீர்மட்டத்தை உயர்த்தவும், பழுதடைந்த மழைநீர் சேகரிப்பு அமைப்புகளைச் சீரமைக்கவும் மாநிலம் முழுவதும் விழிப்புணர்வு இயக்கத்தைத் தமிழக அரசு முன்னெடுத்துள்ளது. மழைநீரை முறையாகச் சேமித்து, நீர்வளங்களைப் பாதுகாப்பதில் பொதுமக்களின் பங்களிப்பை அதிகரிப்பது இத்திட்டத்தின் நோக்கமாகும்.
இதற்கான வழிகாட்டுதல்களை உள்ளடக்கிய அரசாணை எண் 184, நகராட்சி நிர்வாகம் மற்றும் குடிநீர் வழங்கல் துறையால் 2026 அக்டோபர் 16ஆம் தேதி வெளியிடப்பட்டது. இதன்படி, ஏற்கெனவே உள்ள மழைநீர் சேகரிப்பு வசதிகளை ஆய்வு செய்து, அவற்றைப் பராமரிப்பதுடன், புதிய கட்டமைப்புகள் தேவைப்படும் கட்டடங்களைக் கண்டறியவும் நடவடிக்கைகள் மேற்கொள்ளப்பட உள்ளன.
‘துளி’ விழிப்புணர்வு இயக்கத்தைத் தொடங்கிய முதல்வர் விஜய்:
சென்னையில் 2026 அக்டோபர் 21ஆம் தேதி நடைபெற்ற நிகழ்ச்சியில், தமிழக முதல்வர் சி. ஜோசப் விஜய், ‘துளி’ மழைநீர் சேகரிப்பு விழிப்புணர்வு இயக்கத்தைத் தொடங்கி வைத்து, அதன் சின்னத்தையும் அறிமுகப்படுத்தினார்.
மாநகராட்சிகள், நகராட்சிகள், பேரூராட்சிகள் மற்றும் கிராம ஊராட்சிகள் என மாநிலத்தின் அனைத்துப் பகுதிகளிலும் இத்திட்டத்தைச் செயல்படுத்தத் திட்டமிடப்பட்டுள்ளது. அரசுத் துறைகளும் உள்ளாட்சி அமைப்புகளும் இணைந்து செயல்படுவதுடன், வீடுகள், கல்வி நிறுவனங்கள் மற்றும் வணிக நிறுவனங்களில் மழைநீர் சேகரிப்பை ஊக்குவிக்கவும் நடவடிக்கை எடுக்கப்பட உள்ளது.
மழைநீர் சேகரிப்பு அமைப்புகளைப் பராமரிக்க நடவடிக்கை:
அரசு அலுவலகங்கள், பள்ளிகள், மருத்துவமனைகள், குடியிருப்புகள் மற்றும் வணிக நிறுவனங்களில் உள்ள மழைநீர் சேகரிப்பு வசதிகளை அதிகாரிகள் ஆய்வு செய்ய உள்ளனர்.
இதன் ஒரு பகுதியாக, மேற்கூரைகள் மற்றும் நீர்வடிகால் பாதைகளைச் சுத்தம் செய்தல், அடைப்புகளை ஏற்படுத்தும் வண்டல் மண்ணை அகற்றுதல், சேதமடைந்த பகுதிகளைப் பழுதுபார்த்தல், மழைநீர் நிலத்துக்குள் ஊடுருவுவதற்கான குழிகள் மற்றும் கிணறுகளைச் சீரமைத்தல் போன்ற பணிகள் மேற்கொள்ளப்படும்.
மழைநீர் சேகரிப்பு வசதிகள் இல்லாத கட்டடங்களைக் கண்டறிந்து, அங்கு உரிய கட்டமைப்புகளை ஏற்படுத்தவும் நடவடிக்கை எடுக்கப்படும். மேலும், இதுதொடர்பான நடைமுறை விதிகள் முறையாகப் பின்பற்றப்படுவதை உறுதிசெய்யவும் திட்டமிடப்பட்டுள்ளது.
நிலத்தடி நீர்மட்டத்தை உயர்த்தப் புதிய முயற்சிகள்:
மழைநீரை வீணாக்காமல் சேமிப்பதுடன், அது நிலத்துக்குள் ஊடுருவுவதற்கான வசதிகளை மேம்படுத்துவதிலும் அரசு கவனம் செலுத்துகிறது. இதற்காக, இடத்தின் தன்மைக்கு ஏற்ப மேற்கூரை மழைநீர் சேகரிப்பு அமைப்புகள், நீர் ஊடுருவும் குழிகள், அகழிகள் மற்றும் நிலத்தடி நீர் செறிவூட்டும் கிணறுகள் அமைப்பது ஊக்குவிக்கப்பட உள்ளது.
இந்த முயற்சியில் குடியிருப்போர் நலச் சங்கங்கள், கல்வி நிறுவனங்கள், தன்னார்வ அமைப்புகள், தொழில் நிறுவனங்கள் மற்றும் சமூக அமைப்புகளும் பங்கேற்க ஊக்குவிக்கப்பட உள்ளன. மழைநீரைச் சேமிப்பதன் அவசியம் குறித்து மக்களிடையே விழிப்புணர்வை ஏற்படுத்தி, நீர் வீணாவதைக் குறைப்பதே இதன் முக்கிய நோக்கமாகும்.
தமிழகத்தில் மழைநீர் சேகரிப்புத் திட்டம் 2001ஆம் ஆண்டு அப்போதைய முதல்வர் ஜெ. ஜெயலலிதா தலைமையிலான அரசால் தொடங்கப்பட்டது. இதனைத் தொடர்ந்து, இத்திட்டத்தை மேம்படுத்துவதற்கான நடவடிக்கைகள் குறித்து 2002 நவம்பர் 11ஆம் தேதி அரசாணை எண் 158 வெளியிடப்பட்டது.
பின்னர், 2003ஆம் ஆண்டு கட்டடங்களில் மழைநீர் சேகரிப்பு அமைப்புகளை ஏற்படுத்துவது மாநிலத்தின் கட்டட ஒழுங்குமுறை விதிகளின்கீழ் கட்டாயமாக்கப்பட்டது.இந்தத் திட்டத்தின் தொடர்ச்சியாக அறிமுகப்படுத்தப்பட்டுள்ள ‘துளி’ இயக்கம், ஏற்கெனவே அமைக்கப்பட்ட மழைநீர் சேகரிப்பு வசதிகளைச் செயல்படும் நிலையில் வைத்திருப்பதற்கும், புதிய கட்டமைப்புகளைத் தேவையான இடங்களில் ஏற்படுத்துவதற்கும் முக்கியத்துவம் அளிக்கிறது.
மழைநீரைச் சேமித்தல், நிலத்தடி நீர்வளத்தைப் பாதுகாத்தல் மற்றும் எதிர்கால நீர்த் தேவைகளைச் சமாளிப்பதற்கான நடவடிக்கைகளை வலுப்படுத்துதல் ஆகியவற்றின் மூலம் தமிழகத்தின் நீண்டகால நீர்ப் பாதுகாப்பை மேம்படுத்துவதை இந்த இயக்கம் நோக்கமாகக் கொண்டுள்ளது.
