2026 ஆசிய விளையாட்டுப் போட்டியில் இந்தியா 85 பதக்கங்களை வென்று பதக்கப் பட்டியலில் 4-வது இடத்தைப் பிடித்தது. 21 தங்கம், 27 வெள்ளி, 37 வெண்கலம் என இந்திய வீரர்கள் குவித்த பதக்கங்களுடன், தமிழகத்தைச் சேர்ந்த வீரர், வீராங்கனைகளின் பங்களிப்பும் கவனம் பெற்றது.
தமிழகத்திலிருந்து 37 பேர் பங்கேற்பு:
இந்திய அணிக்காக தமிழ்நாட்டைச் சேர்ந்த 37 வீரர், வீராங்கனைகள் 11 விளையாட்டுப் பிரிவுகளில் பங்கேற்றனர். இவர்களில் 12 பேர் இணைந்து 18 பதக்கங்களை வென்றுள்ளனர்.
ஆசிய விளையாட்டில் பங்கேற்ற தமிழக வீரர்களை ஊக்குவிக்கும் வகையில் முதல்வர் விஜய் தலைமையிலான தமிழக அரசு சிறப்பு நிதியுதவியை வழங்கியது. போட்டியில் பங்கேற்ற 37 தமிழக வீரர், வீராங்கனைகளுக்கும் தலா ரூ.7 லட்சம் வழங்கப்பட்டு, மொத்தம் ரூ.2.59 கோடி சிறப்பு நிதியுதவியாக வழங்கப்பட்டது.
பதக்க வீரர்களுக்கு அதிகரிக்கப்பட்ட பரிசுத்தொகை:
பதக்கம் வென்ற வீரர்களுக்கான ஊக்கத்தொகையையும் தமிழக அரசு உயர்த்தியுள்ளது. அதன்படி தங்கப் பதக்கத்திற்கு ரூ.75 லட்சம், வெள்ளிப் பதக்கத்திற்கு ரூ.50 லட்சம், வெண்கலப் பதக்கத்திற்கு ரூ.30 லட்சம் வழங்கப்படுகிறது.
ஆசிய விளையாட்டில் தமிழக வீரர்கள் பெற்ற பதக்கங்களின் அடிப்படையில், பலருக்கு லட்சங்களைத் தாண்டி கோடிகளில் ஊக்கத்தொகை கிடைக்கும் நிலை உருவாகியுள்ளது.
3 பதக்கங்கள் வென்ற வித்யா ராம்ராஜ்:
இந்தப் பட்டியலில் அதிக கவனம் பெற்றவர் தடகள வீராங்கனை வித்யா ராம்ராஜ். ஒரே ஆசிய விளையாட்டில் தங்கம், வெள்ளி, வெண்கலம் என மூன்று பதக்கங்களை அவர் வென்றார்.
குறிப்பாக 400 மீட்டர் தடை ஓட்டத்தில் 54.75 விநாடிகளில் பந்தயத்தை முடித்து, பி.டி. உஷாவின் நீண்டகால தேசிய சாதனையை முறியடித்தார். மூன்று பதக்கங்களுக்காக வித்யாவுக்கு மொத்தம் ரூ.1.55 கோடி ஊக்கத்தொகை வழங்கப்படுகிறது.
கிரிக்கெட் தங்கம் வென்ற கமலினி:
இந்திய பெண்கள் கிரிக்கெட் அணியுடன் தங்கப் பதக்கம் வென்ற தமிழக வீராங்கனை கமலினிக்கு ரூ.75 லட்சம் ஊக்கத்தொகை வழங்கப்படுகிறது.
ஸ்குவாஷில் தமிழக வீரர்களின் சாதனை:
ஸ்குவாஷிலும் தமிழக வீரர்கள் குறிப்பிடத்தக்க வெற்றியைப் பதிவு செய்தனர். அபய் சிங் தனிநபர் பிரிவில் வெள்ளியும், அணிப் பிரிவில் வெண்கலமும் வென்றதால் அவருக்கு ரூ.80 லட்சம் ஊக்கத்தொகை கிடைக்கிறது.
இதேபோல் இரண்டு பதக்கங்களை வென்ற ஜோஷ்னா சின்னப்பா மற்றும் வேலவன் செந்தில்குமார் ஆகியோருக்கு தலா ரூ.60 லட்சம் வழங்கப்படுகிறது.
தடகளத்திலும் பதக்க வேட்டை:
தடகளத்தில் விஷால் தென்னரசு கலப்பு 4×400 மீட்டர் தொடர் ஓட்டத்தில் வெள்ளியும், ஆண்கள் 4×400 மீட்டர் தொடர் ஓட்டத்தில் வெண்கலமும் வென்றார். இதன் மூலம் அவருக்கு ரூ.80 லட்சம் ஊக்கத்தொகை வழங்கப்படுகிறது.
இதுதவிர, பரணிகா இளங்கோவன், அபிநயா ராஜராஜன், ஹரிஹரன், ராஜேஷ் ரமேஷ், ஷமீனா ரியாஸ் உள்ளிட்ட தமிழக வீரர், வீராங்கனைகளும் வெண்கலப் பதக்கங்களை வென்று மாநிலத்திற்கு பெருமை சேர்த்துள்ளனர். இவர்களுக்கு தலா ரூ.30 லட்சம் ஊக்கத்தொகை வழங்கப்படுகிறது.
பெண்களுக்கான போல்வால்ட் போட்டியில் வெண்கலம் வென்ற பரணிகா இளங்கோவன், ஆசிய விளையாட்டில் இந்தப் பிரிவில் பதக்கம் வென்ற முதல் இந்திய வீராங்கனை என்ற சிறப்பையும் பெற்றார்.
செயிலிங்கில் நேத்ரா குமணன்:
செயிலிங் போட்டியிலும் தமிழகத்திற்கு பதக்கம் கிடைத்தது. பெண்களுக்கான டிங்கி பிரிவில் நேத்ரா குமணன் வெண்கலப் பதக்கம் வென்றார். அவருக்கு ரூ.30 லட்சம் ஊக்கத்தொகை அறிவிக்கப்பட்டுள்ளது.
ரூ.6.9 கோடியாக உயர்ந்த மொத்த ஊக்கத்தொகை:
நேத்ராவின் பதக்கம் சேர்க்கப்பட்ட பின்னர், ஆசிய விளையாட்டில் பதக்கம் வென்ற தமிழகத்தைச் சேர்ந்த 12 வீரர், வீராங்கனைகளுக்கு வழங்கப்படும் மொத்த ஊக்கத்தொகை ரூ.6.9 கோடியாக உயர்ந்துள்ளது.
இந்தியாவின் 85 பதக்க வெற்றியுடன் தமிழக வீரர்களின் சாதனைகளும் இணைந்துள்ள நிலையில், முதல்வர் விஜய் தலைமையிலான தமிழக அரசு வழங்கும் ஊக்கத்தொகை, சர்வதேச அளவில் சாதிக்கும் மாநில வீரர்களுக்கு மேலும் ஊக்கமளிக்கும் வகையில் அமைந்துள்ளது.
