கொல்லம் மாவட்டத்தைச் சேர்ந்த 24 வயது அஞ்சு, தனது கணவர் தினேஷ் மற்றும் அவரது குடும்பத்தினர் மீது வரதட்சணை கொடுமை தொடர்பாக புகார் அளித்துள்ளார்.
திருமணத்துக்குப் பிறகு தன்னை துன்புறுத்தியதாகவும், சவுதி அரேபியாவில் கணவர் தன்னை தாக்கியதாகவும் அவர் குற்றம்சாட்டியுள்ளார்.
சவுதியில் தாக்கப்பட்டதாக குற்றச்சாட்டு:
கணவருடன் சவுதி அரேபியாவுக்குச் சென்ற பின்னர், பிரச்சினை மேலும் தீவிரமடைந்ததாக அஞ்சு கூறியுள்ளார். வீட்டில் இருந்த பொருட்களை பயன்படுத்தி தன்னை தாக்கியதாகவும், கத்தியைக் காட்டி மிரட்டியதாகவும் அவர் குற்றம்சாட்டியுள்ளார். தாக்குதலில் உடலின் பல பகுதிகளில் காயங்கள் ஏற்பட்டதாகவும் தெரிவித்துள்ளார்.
மேலும், தன்னைப் பற்றி பிறரிடம் தெரிவிக்குமாறு கட்டாயப்படுத்தப்பட்ட சில கருத்துகளை ஆடியோ மற்றும் வீடியோவாக பதிவு செய்து, அவற்றை உறவினர்களிடம் பகிர்ந்ததாகவும் புகாரில் குறிப்பிடப்பட்டுள்ளது.
செப்டம்பர் 30-ல் திரும்பிய அஞ்சு:
சவுதி அரேபியாவில் இருந்து செப்டம்பர் 30-ஆம் தேதி திரும்பிய அஞ்சு, கொல்லம் மாவட்ட அரசு மருத்துவமனையில் சிகிச்சை பெற்றதாக தகவல்கள் தெரிவிக்கின்றன. அங்கு போலீசார் அவரது வாக்குமூலத்தையும் பதிவு செய்துள்ளனர்.
கணவர், பெற்றோர் மீது வழக்கு:
புகாரின் அடிப்படையில் சாவரா போலீசார் நந்து தினேஷ் மற்றும் அவரது பெற்றோர் தினேஷ், ஜகதம்மா ஆகியோர் மீது வழக்குப் பதிவு செய்துள்ளனர். பாரதிய நியாய சன்ஹிதா மற்றும் வரதட்சணைத் தடுப்புச் சட்டத்தின் கீழ் வழக்குப்பதிவு செய்யப்பட்டுள்ளதாக போலீசார் தெரிவித்துள்ளனர்.
நந்து தற்போது சவுதி அரேபியாவில் இருப்பதாக கூறப்படும் நிலையில், அவரை இந்தியாவுக்கு அழைத்து வருவதற்கான நடவடிக்கைகள் மேற்கொள்ளப்பட்டு வருவதாக தகவல்கள் தெரிவிக்கின்றன. வழக்கு தொடர்பான விசாரணை தொடர்ந்து நடைபெற்று வருகிறது.
