தமிழ்நாட்டில் பல்கலைக்கழகங்களுக்கான துணைவேந்தர் நியமனம் தொடர்பான விவகாரத்தில், ஆளுநருடன் பேச்சுவார்த்தை நடத்தி சுமூகமான தீர்வு காணப்படும் என்று உயர்கல்வித் துறை அமைச்சர் பி. விஸ்வநாதன் தெரிவித்துள்ளார்.
திருச்சியில் செய்தியாளர்களிடம் பேசிய அமைச்சர், தமிழக அரசுக்கும் ஆளுநருக்கும் இடையே தற்போது இணக்கமான உறவு இருப்பதாகக் கூறினார். இதனால் துணைவேந்தர் நியமனம் தொடர்பான பிரச்சினைகளையும் பேச்சுவார்த்தை மூலம் தீர்க்க முடியும் என அவர் தெரிவித்தார்.
மேலும், முந்தைய தி.மு.க. ஆட்சிக் காலத்தில் ஆளுநர் – முதலமைச்சர் இடையே தொடர்ந்து கருத்து மோதல்கள் இருந்ததாகக் குறிப்பிட்ட விஸ்வநாதன், “நாங்கள் அப்படி அல்ல. இணக்கமான உறவு இருப்பதால் துணைவேந்தர் பிரச்சினையை சுமூகமாகப் பேசித் தீர்ப்போம்” என்று கூறினார்.
தமிழ்நாட்டில் துணைவேந்தர் நியமனம் தொடர்பான விவகாரம் கடந்த சில ஆண்டுகளாக ஆளுநர் மற்றும் மாநில அரசுக்கு இடையிலான முக்கிய பிரச்சினைகளில் ஒன்றாக இருந்து வருகிறது. துணைவேந்தர் தேர்வுக்கான தேடுதல் குழுவில் UGC பிரதிநிதியை சேர்ப்பது உள்ளிட்ட விவகாரங்களிலும் இரு தரப்புக்கும் இடையே கருத்து வேறுபாடுகள் ஏற்பட்டிருந்தன.
இதற்கிடையில், துணைவேந்தர் நியமனங்கள் தொடர்பாக முதலமைச்சர் விஜய் மற்றும் ஆளுநர் இடையே பேச்சுவார்த்தைகள் நடைபெற்று வருவதாகவும், விரைவில் தீர்வு காணப்படும் என்றும் அமைச்சர் தெரிவித்திருந்தார்.
பல்கலைக்கழகங்களின் நிர்வாகத்தில் துணைவேந்தர் பதவி முக்கியத்துவம் வாய்ந்த நிலையில், நியமனம் தொடர்பான விவகாரம் தொடர்ந்து கவனம் பெற்றுள்ளது. இந்நிலையில், ஆளுநருடன் பேச்சுவார்த்தை மூலம் பிரச்சினைக்கு தீர்வு காணப்படும் என அமைச்சர் தெரிவித்திருப்பது குறிப்பிடத்தக்கது.