கல்வி அமைச்சர் ராஜினாமா கோரி சோனம் வாங்சுக் போராட்டம்: ஒரு வரலாற்றுப் பார்வை!

இந்தியாவின் ஒட்டுமொத்த கவனமும் தற்போது தலைநகர் டெல்லியை நோக்கித் திரும்பியிருக்கிறது. இந்தத் தேசிய அளவிலான கவனத்திற்குக் மிக முக்கியக் காரணம், கல்விச் சீர்திருத்தங்களை வலியுறுத்தித் தொடர் உண்ணாவிரதப் போராட்டத்தில் ஈடுபட்டு வரும் லடாக்கின் சமூக ஆர்வலர் சோனம் வாங்சுக் (Sonam Wangchuk) ஆவார். யார் இந்தச் சோனம் வாங்சுக்? அவர் எதற்காக இந்த உண்ணாவிரதப் போராட்டத்தை முன்னெடுத்துள்ளார்? அஹிம்சை வழி உண்ணாவிரதப் போராட்டங்களில் இந்திய வரலாற்றின் பின்னணி என்ன??

யார் இந்தச் சோனம் வாங்சுக்?

சோனம் வாங்சுக் இந்தியாவின் லடாக் பகுதியைச் சேர்ந்த ஒரு மிகப்பிரபலமான கல்வி சீர்திருத்தவாதி, கண்டுபிடிப்பாளர் மற்றும் சுற்றுச்சூழல் ஆர்வலர் ஆவார். 2018-ஆம் ஆண்டில் ஆசியாவின் நோபல் பரிசு எனப்படும் மதிப்புமிக்க ‘ரமோன் மக்சேசே’ (Ramon Magsaysay) விருது இவருக்கு வழங்கப்பட்டது.

ஐஸ் ஸ்தூபி (Ice Stupa): லடாக்கின் கடுமையான கோடைகாலத் தண்ணீர் பற்றாக்குறையைப் போக்க, குளிர்கால நீரைச் சேமித்துக் கூம்பு வடிவிலான செயற்கைப் பனிப்பாறைகளை (Artificial Glaciers) உருவாக்கும் தொழில்நுட்பத்தைக் கண்டுபிடித்து விவசாயப் புரட்சி செய்தவர்.

SECMOL பள்ளி: லடாக்கில் பாரம்பரிய கல்வி முறையில் தோல்வியடைந்த மாணவர்களுக்காக 1988-ல் SECMOL (The Students’ Educational and Cultural Movement of Ladakh) என்ற மாற்றுப் பள்ளியைத் தொடங்கினார். இந்த வளாகம் முழுவதும் முற்றிலும் சூரிய ஆற்றலால் (Solar Energy) இயங்குகிறது.

தற்போதைய டெல்லி போராட்டம் மற்றும் கோரிக்கைகள்

கடந்த ஜூன் 28-ஆம் தேதி முதல் ‘காக்ரோச் ஜனதா கட்சி’ (CJP) அமைப்போடு இணைந்து, டெல்லியில் தொடர் உண்ணாவிரதப் போராட்டத்தைத் தொடங்கினார் சோனம் வாங்சுக். 20 நாட்களுக்கும் மேலாகத் திண்ம உணவைத் தவிர்த்ததால், அவரது உடலில் நீரிழப்பு மற்றும் பொட்டாசியம் குறைபாடு ஏற்பட்டு உடல்நிலை மிகவும் மோசமடைந்தது. இதையடுத்து, டெல்லி காவல்துறை அவரை ஜந்தர் மந்தரிலிருந்து சஃப்தர்ஜங் மருத்துவமனைக்கு மாற்றியது.

மருத்துவமனையில் இருந்தபடியே, ‘இது நாட்டின் இரண்டாவது விடுதலைப் போராட்டம்’ என்று முழங்கியுள்ள வாங்சுக், தனது போராட்டத்தை வாபஸ் பெற முக்கிய நிபந்தனைகளை விதித்துள்ளார்:

• தேசிய அளவிலான போட்டித் தேர்வுகளின் வினாத்தாள் கசிவு விவகாரத்திற்குப் பொறுப்பேற்று, மத்திய கல்வி அமைச்சர் தர்மேந்திர பிரதான் உடனடியாகத் தனது பதவியை ராஜினாமா செய்ய வேண்டும்.

• எதிர்காலத்தில் வினாத்தாள் கசிவுகள் ஏற்படுவதைத் தடுக்க, தேசிய தேர்வு முறையில் (National Examination System) முறையான பொறுப்புக்கூறல் மற்றும் கட்டமைப்பு ரீதியான முழுமையான சீர்திருத்தங்கள் கொண்டு வரப்பட வேண்டும்.

• இந்தத் தேர்வு முறைகேடு நெருக்கடியின் காரணமாக மன உளைச்சலால் உயிரிழந்த மாணவர்களின் குடும்பங்களுக்குத் தலா ₹1 கோடி இழப்பீடு வழங்கப்பட வேண்டும்.

• மாணவர்களின் எதிர்காலப் பாதுகாப்பை உறுதி செய்யும் வகையில், வலுவான மற்றும் வெளிப்படையான ஒரு தேசிய கொள்கை (Robust & Transparent Policy) உருவாக்கப்பட வேண்டும்.

அரசுத் தரப்பில் நாடாளுமன்ற வாசலில் தங்களைச் சந்தித்து இந்த உறுதியைத் தர வேண்டும் எனப் போராட்டக்காரர்கள் வலியுறுத்துகின்றனர். தற்போது டெல்லியில் 163 BNSS (பழைய 144 தடை உத்தரவு) போடப்பட்டிருந்தாலும், சோனம் வாங்சுக்கின் மனைவி கீதாஞ்சலி தலைமையில் மாணவர்கள் மற்றும் பொதுமக்கள் நாடாளுமன்றத்தை நோக்கிப் பேரணியாகச் செல்கிறார்கள்.

இந்திய உண்ணாவிரதப் போராட்டங்களின் வரலாற்றுப் பின்னணி:

இந்தியாவின் அரசியல் மற்றும் சமூக மாற்றங்களை முன்னெடுத்துச் செல்வதில் உண்ணாவிரதப் போராட்டங்களுக்கு மிக நீண்ட நெடிய வரலாறு உண்டு. இந்த அஹிம்சை ஆயுதத்தின் தொடக்கப் புள்ளியாக நாம் மகாத்மா காந்தியைக் குறிப்பிடலாம்.

மகாத்மா காந்தி (1933): இந்திய சுதந்திரப் போராட்டக் காலத்தில் காந்தியடிகள் பலமுறை உண்ணாவிரதம் இருந்திருக்கிறார். குறிப்பாக 1933-ல், தீண்டாமைக்கு எதிராகவும், தலித் மக்களின் முன்னேற்றத்திற்காகவும் அவர் மேற்கொண்ட 21 நாட்கள் உண்ணாவிரதப் போராட்டம் ஒட்டுமொத்த தேசத்தின் சாதியக் கட்டமைப்பையே கேள்விக்குள்ளாக்கியது.

பகத் சிங் & ஜதின் தாஸ் (1929 – லாகூர் சிறை): லாகூர் சிறையில் அடைக்கப்பட்டிருந்த இந்தியக் கைதிகளுக்கு, ஐரோப்பியக் கைதிகளுக்கு இணையான சம உரிமை, நல்ல உணவு மற்றும் ஆடைகள் வழங்கப்பட வேண்டும் என்று கோரி பகத் சிங் உண்ணாவிரதம் இருந்தார். இந்த வரலாற்றுச் சிறப்புமிக்கப் போராட்டம் 116 நாட்கள் நீடித்தது. இதில் சக புரட்சியாளர் ஜதின் தாஸ், 63 நாட்கள் உண்ணாவிரதம் இருந்து சிறையிலேயே தன்னுயிரைத் தியாகம் செய்தார். இதுதான் இந்திய வரலாற்றில் மிகப்பெரிய எழுச்சியை ஏற்படுத்திய தொடக்ககாலச் சிறை உண்ணாவிரதம்.

பொட்டி ஸ்ரீராமுலு (1952 – ஆந்திர மாநில உருவாக்கம்): சென்னை மாகாணத்திலிருந்து தெலுங்கு பேசும் மக்களுக்கு எனத் தனியாக ஆந்திர மாநிலத்தைப் பிரிக்க வேண்டும் என்று கோரி பொட்டி ஸ்ரீராமுலு மெட்ராஸில் உண்ணாவிரதத்தைத் தொடங்கினார். 58 நாட்கள் தொடர் உண்ணாவிரதத்திற்குப் பிறகு அவர் உயிர் துறந்தார். இவரது மரணம் ஏற்படுத்திய மிகப்பெரிய மக்கள் கொந்தளிப்புதான், இந்தியாவில் ‘மொழிவாரி மாநிலங்கள்’ பிரிக்கப்படுவதற்குக் காரணமாய் அமைந்தது.

அன்னா ஹசாரே (2011 – டெல்லி ராம்லீலா மைதானம்): ஊழலுக்கு எதிராக வலுவான சட்டம் கொண்டு வர வேண்டும், ‘ஜன லோக்பால்’ (Jan Lokpal Bill) மசோதாவை நிறைவேற்ற வேண்டும் என்று கோரி சமூக ஆர்வலர் அன்னா ஹசாரே டெல்லி ராம்லீலா மைதானத்தில் 13 நாட்கள் வரலாற்று உண்ணாவிரதப் போராட்டத்தை நடத்தினார். இந்திய இளைஞர்கள் லட்சக்கணக்கில் திரண்டு டெல்லியை ஸ்தம்பிக்க வைத்த போராட்டம் இது.

இரோம் ஷர்மிளா (2000 – 2016 / மணிப்பூர்): இந்தியாவின் மிக நீண்ட உண்ணாவிரதப் போராட்டம் இதுதான். மணிப்பூரில் ராணுவத்திற்கான சிறப்பு அதிகாரச் சட்டமான AFSPA-வை ரத்துச் செய்யக் கோரி, இரோம் ஷர்மிளா 16 ஆண்டுகள் தொடர் உண்ணாவிரதம் இருந்தார். மூக்கு வழியாகக் குழாய் மூலம் வலுக்கட்டாயமாக உணவு திரவம் செலுத்தப்பட்டு, ‘மணிப்பூரின் இரும்புப் பெண்மணி’ என்று உலகத்தாரால் அழைக்கப்பட்டார்.

சுதந்திர இந்தியாவின் வரலாற்றில் கொள்கை ரீதியான மாற்றங்களை உருவாக்குவதில் அஹிம்சை வழி உண்ணாவிரதப் போராட்டங்கள் எப்போதும் ஒரு முக்கிய அங்கமாகவே இருந்து வந்திருக்கின்றன. தற்போது ஜந்தர் மந்தரில் நடந்து வரும் கல்விச் சீர்திருத்த போராட்டமும் அத்தகையதொரு சூழலை நோக்கியே நகர்கிறது.

நாட்டின் கல்வி அமைப்பில் பொறுப்புக்கூறல் இருக்க வேண்டும் என்பது போராட்டக்காரர்களின் முதன்மைக் கோரிக்கையாக இருக்கும் வேளையில், நாடாளுமன்றக் கூட்டத்தொடர் நடக்கும் இச்சமயத்தில் நிர்வாக ரீதியான ஒழுங்கையும் சட்டம்-ஒழுங்கையும் நிலைநாட்டுவது அதிகார அமைப்பின் கடமையாக உள்ளது. இந்த விவகாரத்தில் மாணவர்களின் கல்வி எதிர்காலத்தைப் பாதுகாக்கும் வகையிலும், அதே நேரத்தில் நாட்டின் அமைதிக்குக் குந்தகம் விளைவிக்காத வகையிலும் இருதரப்பிற்கும் இடையே சுமுகமான ஒரு உடன்பாடும் தீர்வும் எட்டப்படுமா என்பதை நாம் பொறுத்திருந்துதான் பார்க்க வேண்டும்..!!