ஒரு காலத்தில் மனிதர்களுக்கும் விலங்குகளுக்கும் இடையிலான வேறுபாட்டை விளக்குவதற்குப் பயன்படுத்தப்பட்ட ‘Human’ என்ற சொல், இன்று மனிதர்களுக்கும் இயந்திரங்களுக்கும் இடையிலான வேறுபாட்டை அடையாளப்படுத்த வேண்டிய நிலைக்குத் தள்ளப்பட்டுள்ளது. செயற்கை நுண்ணறிவு (AI) மனிதர்களின் சிந்தனை, படைப்பாற்றல், வேலைவாய்ப்பு எனப் பல தளங்களில் ஆதிக்கம் செலுத்தத் தொடங்கியுள்ள நிலையில், மனிதர்களாக இருப்பதன் அர்த்தம் குறித்த விவாதமும் உலகம் முழுவதும் தீவிரமடைந்துள்ளது.
இந்தச் சூழலில், 2026ஆம் ஆண்டுக்கான தனது ‘Word of the Year’ ஆக ‘Human’ என்ற சொல்லைத் தேர்ந்தெடுத்துள்ளது கேம்பிரிட்ஜ் அகராதி (Cambridge Dictionary). இது வெறுமனே ஒரு சொல்லுக்குக் கிடைத்த அங்கீகாரம் மட்டுமல்ல. தொழில்நுட்ப வளர்ச்சியின் வேகத்தில் மனிதர்கள் தங்களுடைய தனித்துவத்தையும் அடையாளத்தையும் இழந்துவிடுவார்களோ என்ற உலகளாவிய கவலையின் வெளிப்பாடும்கூட.
ஏன் மீண்டும் ‘Human’ என்ற சொல்லுக்கு இவ்வளவு முக்கியத்துவம்?
கடவுள்கள், விலங்குகள் மற்றும் இயந்திரங்களிடமிருந்து வேறுபட்டு, மனிதர்களுக்கே உரிய குணங்கள், குறைபாடுகள் மற்றும் உணர்வுகளைக் கொண்டிருப்பதே ‘Human’ என்ற சொல்லின் பொருள் என்கிறது கேம்பிரிட்ஜ் அகராதி.
ஆனால், இந்தச் சொல்லின் பயன்பாடு தற்போது புதிய பரிமாணத்தைப் பெற்றுள்ளது. குறிப்பாக, ‘Human-made’, ‘Human-written’, ‘Human-generated’ போன்ற சொற்களின் பயன்பாடு அதிகரித்து வருகிறது. அதாவது, ஒரு படைப்பு மனிதர்களால் உருவாக்கப்பட்டது என்பதைத் தனியாகக் குறிப்பிட வேண்டிய தேவை உருவாகியுள்ளது.
ஒரு காலத்தில் மனிதர்களால் உருவாக்கப்படுவது இயல்பானதாக இருந்தது. ஒரு கட்டுரையைப் படிக்கும்போது அதை எழுதியவர் மனிதரா என்று கேட்க வேண்டிய அவசியம் இருக்கவில்லை. ஒரு ஓவியத்தைப் பார்க்கும்போது அதை வரைந்தவர் உண்மையான கலைஞரா என்று சந்தேகிக்க வேண்டிய சூழலும் இல்லை. ஆனால், AI தொழில்நுட்பங்களின் வளர்ச்சி இந்த இயல்பான புரிதலையே மாற்றியமைத்துள்ளது.
இன்று ஒரு புகைப்படம் உண்மையானதா, ஒரு குரல் மனிதருடையதா, ஒரு கட்டுரை மனிதர்களால் எழுதப்பட்டதா என்பதைச் சரிபார்க்க வேண்டிய நிலை உருவாகியுள்ளது. இதன் காரணமாகவே, மனிதர்களால் உருவாக்கப்படும் படைப்புகளின் தனித்துவத்தை அடையாளப்படுத்தும் தேவை அதிகரித்துள்ளதாக கேம்பிரிட்ஜ் சுட்டிக்காட்டுகிறது.
மனிதர்களின் வேலையை மட்டுமல்ல, சிந்தனையையும் மாற்றும் AI!
செயற்கை நுண்ணறிவு வளர்ச்சி என்பது சில வேலைவாய்ப்புகளை இயந்திரங்கள் எடுத்துக்கொள்வதுடன் முடிந்துவிடும் பிரச்சினையல்ல. மனிதர்கள் எவ்வாறு சிந்திக்கிறார்கள், முடிவெடுக்கிறார்கள், கற்றுக்கொள்கிறார்கள், படைக்கிறார்கள் என்பதையும் அது மாற்றியமைக்கத் தொடங்கியுள்ளது.
கட்டுரைகள் எழுதுவது, செய்திகளைத் தொகுப்பது, புகைப்படங்களை உருவாக்குவது, திரைப்படங்களுக்கான காட்சிகளை வடிவமைப்பது, இசையமைப்பது என மனிதர்களின் அறிவையும் படைப்பாற்றலையும் சார்ந்திருந்த பல பணிகளை AI தொழில்நுட்பங்கள் மேற்கொள்கின்றன.
இதனால் உற்பத்தித்திறன் அதிகரிப்பதுடன், பலரது வேலைவாய்ப்புகள் மற்றும் வாழ்வாதாரம் குறித்த அச்சங்களும் உருவாகியுள்ளன.
மைக்ரோசாஃப்ட் நிறுவனத்தின் இணை நிறுவனர் பில் கேட்ஸ், பராமரிப்புப் பணிகள் போன்ற மனிதர்களின் நேரடி ஈடுபாடு அவசியமான வேலைகளை மனிதர்களுக்காகவே ஒதுக்கி வைக்க வேண்டியதன் அவசியத்தை வலியுறுத்தியுள்ளார்.
AI மூலம் நோய்களைக் குணப்படுத்தவும், கல்வியை மேம்படுத்தவும், மனிதர்களுக்குத் தேவையான நேரத்தை உருவாக்கவும் முடியும் என்றாலும், அந்தத் தொழில்நுட்பம் மனித வாழ்க்கையை எந்த அளவுக்கு மேம்படுத்துகிறது என்பதுதான் அதன் வெற்றிக்கான அளவுகோலாக இருக்க வேண்டும் என்றும் அவர் குறிப்பிட்டுள்ளார்.
அதாவது, தொழில்நுட்பம் எவ்வளவு வேகமாக வளர்கிறது என்பதைவிட, அதன் வளர்ச்சி யாருடைய வாழ்க்கையை மேம்படுத்துகிறது என்பதே முக்கியமான கேள்வி.
மனிதப் படைப்பாற்றலைப் பாதுகாக்கப் போராடும் கலைஞர்கள்!
AI வளர்ச்சியால் அதிகம் பாதிக்கப்படும் துறைகளில் படைப்புத் துறைகளும் ஒன்றாக உள்ளன. மனிதக் கலைஞர்களின் படைப்புகளை அவர்களது அனுமதியின்றி AI மாதிரிகளுக்குப் பயிற்சியளிக்கப் பயன்படுத்துவது, அவர்களது குரல் மற்றும் உருவத்தைப் போலியான முறையில் உருவாக்குவது போன்ற விவகாரங்கள் உலகம் முழுவதும் சர்ச்சையை ஏற்படுத்தியுள்ளன.
இதற்கு எதிராக நடிகர்கள் ஸ்கார்லெட் ஜோஹன்சன், கேட் பிளாஞ்செட், இசைக்கலைஞர்கள் பில்லி ஐலிஷ் உள்ளிட்ட பலரும் மனிதப் படைப்பாற்றலைப் பாதுகாக்கும் இயக்கங்களில் இணைந்துள்ளனர்.
குறிப்பாக, மனிதர்களின் படைப்புகளை அனுமதியின்றி பயன்படுத்துவதற்கு எதிராக ‘Human Artistry Campaign’ மற்றும் ‘Artists’ Rights Alliance’ ஆகிய அமைப்புகள் குரல் கொடுத்து வருகின்றன.
இதற்கிடையில், AI மூலம் உருவாக்கப்படும் போலியான குரல்கள் மற்றும் காணொளிகள் பிரபலங்களின் அடையாளத்திற்கும் சவாலாக மாறியுள்ளன.
ஹாலிவுட் நடிகர் மேத்யூ மெக்கோனகே தனது குரல், முகம் மற்றும் புகழ்பெற்ற வசனத்தை அங்கீகரிக்கப்படாத டிஜிட்டல் பயன்பாட்டிலிருந்து பாதுகாக்க வர்த்தக முத்திரைப் பாதுகாப்பை நாடியுள்ளார். பாடகி டெய்லர் ஸ்விஃப்ட்டும் தனது குரல் மற்றும் உருவத்தைப் பாதுகாக்கும் வகையில் வர்த்தக முத்திரை நடவடிக்கைகளை மேற்கொண்டுள்ளார்.
ஒரு மனிதரின் குரலையும் முகத்தையும் அவருக்குத் தெரியாமலேயே பிரதியெடுக்க முடியும் என்ற நிலை உருவாகியிருப்பது, AI வளர்ச்சி உருவாக்கியுள்ள புதிய சட்ட மற்றும் அறநெறிச் சிக்கல்களை வெளிப்படுத்துகிறது.
மனிதர்களுக்கும் செயற்கை நுண்ணறிவுக்கும் இடையிலான வேறுபாடு என்ன?
மனித மனதுக்கும் செயற்கை மனதுக்கும் இடையிலான வேறுபாட்டை எவ்வாறு வரையறுப்பது என்ற கேள்வியும் தற்போது முக்கியத்துவம் பெற்றுள்ளது.
கேம்பிரிட்ஜ் பல்கலைக்கழகத்தின் அறிவியல் தத்துவ ஆய்வாளர் டாக்டர் டாம் மெக்கிளலண்ட், மனிதர்களுக்கும் செயற்கை நுண்ணறிவு அமைப்புகளுக்கும் இடையிலான வேறுபாட்டைப் புரிந்துகொள்ள வேண்டிய காலகட்டத்தில் நாம் இருப்பதாகக் குறிப்பிடுகிறார்.
மனிதர்களை இயந்திரங்களிலிருந்து வேறுபடுத்துவது எது? உணர்வுநிலையா, படைப்பாற்றலா அல்லது இரக்க உணர்வா? இத்தகைய கேள்விகளுக்கான பதில்கள் எளிதானவை அல்ல.
அதேபோல், AI நிர்வாகம் மற்றும் மனித உரிமைகள் தொடர்பான நிபுணரான பேராசிரியர் ரேச்சல் ஆடம்ஸ், செயற்கை நுண்ணறிவு ஏற்கெனவே இருக்கும் சமூக ஏற்றத்தாழ்வுகளை மேலும் அதிகரிக்கும் ஆபத்து இருப்பதாக எச்சரிக்கிறார்.
AI தொழில்நுட்பம் உலகின் பல பிரச்சினைகளுக்குத் தீர்வுகளை உருவாக்கும் திறன் கொண்டிருந்தாலும், அதன் பலன்கள் யாருக்குச் சென்றடைகின்றன, அதன் பாதிப்புகளை யார் எதிர்கொள்கிறார்கள் என்பதையும் கவனிக்க வேண்டியுள்ளது.
தொழில்நுட்பத்தின் எதிர்காலம் ஏற்கெனவே தீர்மானிக்கப்பட்ட ஒன்று அல்ல; அதை மனிதர்களின் முடிவுகளே தீர்மானிக்கின்றன என்பதுதான் இங்கு கவனிக்க வேண்டிய முக்கியமான அம்சம்.
AI ஆதிக்கத்திற்கு மத்தியில் மனிதர்களின் அடையாளத்தைப் பாதுகாக்க முடியுமா?
AI தொழில்நுட்பங்கள் மனிதர்களைப் போல எழுதவும், பேசவும், ஓவியம் வரையவும், இசையமைக்கவும் தொடங்கியுள்ளன. ஆனால், அவை உருவாக்கும் ஒவ்வொரு படைப்பின் பின்னாலும் மனிதர்களின் அனுபவம், உணர்வு, சமூகச் சூழல் மற்றும் வாழ்வியல் புரிதல் இருக்கிறதா என்ற கேள்வி தொடர்கிறது.
இந்தப் பின்னணியில், எழுத்தாளர்களின் படைப்புகளை அடையாளப்படுத்துவதற்காக ‘Human Authored’ என்ற முத்திரையை அறிமுகப்படுத்தியுள்ளது அமெரிக்க எழுத்தாளர் சங்கம் (Authors Guild). இதன் மூலம் ஒரு புத்தகம் மனித எழுத்தாளரால் எழுதப்பட்டது என்பதை வாசகர்களுக்குத் தெரிவிக்க முடியும்.
அதேபோல், AI உருவாக்கும் போலியான உள்ளடக்கங்களிலிருந்து மனிதர்களின் அடையாளத்தையும் படைப்புரிமையையும் பாதுகாப்பதற்கான முயற்சிகளும் அதிகரித்து வருகின்றன.
இந்த விவாதம் தொழில்நுட்பத் துறையோடு மட்டும் தொடர்புடையதல்ல. ஊடகம், கல்வி, கலை, இலக்கியம், வேலைவாய்ப்பு, தனியுரிமை என ஒட்டுமொத்தச் சமூகத்தையும் பாதிக்கக்கூடியது.
AI காலத்தின் சமூக மாற்றங்களைப் பிரதிபலிக்கும் புதிய சொற்கள்!
2026ம் ஆண்டில் கேம்பிரிட்ஜ் அகராதி கவனம் பெற்ற புதிய சொற்களையும் தனது அகராதியில் இணைத்துள்ளது.
அவற்றில் ‘Aura Farming’ மற்றும் ‘Looksmaxxing’ ஆகியவை சமூக வலைதளங்களின் தாக்கத்தை வெளிப்படுத்துகின்றன.
‘Aura Farming’ என்பது சமூக வலைதளங்களில் மற்றவர்களைக் கவரும் வகையில் தனித்துவமான ஆளுமையை வெளிப்படுத்த முயற்சிப்பதைக் குறிக்கிறது.
‘Looksmaxxing’ என்பது குறிப்பாக இளைஞர்கள் மத்தியில், தங்களது உடல் தோற்றத்தை அதிகபட்சமாக மேம்படுத்திக்கொள்ள மேற்கொள்ளப்படும் முயற்சிகளைக் குறிக்கிறது.
‘Air Jail’ என்பது நாய்கள் போன்ற விலங்குகளின் விரும்பத்தகாத நடத்தையைக் கட்டுப்படுத்துவதற்காக அவற்றைச் சிறிது நேரம் தரையிலிருந்து தூக்கிப் பிடிக்கும் பயிற்சி முறையைக் குறிக்கிறது.
மேலும், 2026ஆம் ஆண்டின் சிறந்த சொல்லுக்கான போட்டியில் ‘Agent’, ‘Wholesome’, ‘Analogue’ ஆகிய சொற்களும் இடம்பெற்றிருந்தன.
இதில் ‘Agent’ என்பது மனிதர்களின் நேரடிக் கட்டுப்பாடு இல்லாமலேயே முடிவுகளை எடுத்து இயங்கக்கூடிய AI அமைப்புகளைக் குறிக்கிறது. ‘Analogue’ என்பது இணையம் மற்றும் டிஜிட்டல் தொழில்நுட்பங்களைச் சாராத செயல்பாடுகள், அனுபவங்கள் மற்றும் பொருட்களைக் குறிக்கிறது.
இந்தச் சொற்கள் ஒவ்வொன்றும் தொழில்நுட்ப வளர்ச்சி, சமூக வலைதளங்களின் தாக்கம் மற்றும் மாறிவரும் மனித வாழ்க்கை முறை ஆகியவற்றைப் பிரதிபலிக்கின்றன.
தொழில்நுட்பத்தின் வளர்ச்சியை விட மனிதர்களின் எதிர்காலமே முக்கியம்!
2023ம் ஆண்டில் AI உருவாக்கும் தவறான தகவல்களைக் குறிக்கும் ‘Hallucinate’ என்ற சொல்லை கேம்பிரிட்ஜ் அகராதி தேர்ந்தெடுத்திருந்தது. தற்போது 2026ஆம் ஆண்டில் ‘Human’ என்ற சொல்லைத் தேர்ந்தெடுத்துள்ளது.
இந்த இரண்டு தேர்வுகளுக்கும் இடையில் ஒரு முக்கியமான தொடர்பு இருக்கிறது. முதலில் AI உருவாக்கும் தவறான தகவல்கள் குறித்த கவலை வெளிப்பட்டது. தற்போது அந்தத் தொழில்நுட்பத்தின் வளர்ச்சிக்கு மத்தியில் மனிதர்களாக இருப்பதன் அர்த்தம் குறித்த கேள்வி முன்னிலைக்கு வந்துள்ளது.
ஒருபுறம் AI தொழில்நுட்பம் மனிதர்களின் உழைப்பைக் குறைத்து, பல்வேறு துறைகளில் புதிய வாய்ப்புகளை உருவாக்குகிறது. மறுபுறம், மனிதர்களின் வேலைவாய்ப்பு, படைப்புரிமை, தனியுரிமை மற்றும் சிந்திக்கும் திறன் ஆகியவற்றுக்கு அது புதிய சவால்களையும் ஏற்படுத்துகிறது.
எனவே, AI வளர்ச்சியை முழுமையாக நிராகரிப்பதோ அல்லது அதன் அனைத்துச் செயல்பாடுகளையும் கண்மூடித்தனமாக ஏற்றுக்கொள்வதோ தீர்வாகாது. தொழில்நுட்பத்தின் பலன்கள் அனைவருக்கும் கிடைப்பதையும், அதன் பாதிப்புகளிலிருந்து மனிதர்களின் உரிமைகள் பாதுகாக்கப்படுவதையும் உறுதிசெய்வதே அவசியம்.
மனிதர்களின் படைப்பாற்றல், உணர்வுகள், அனுபவங்கள் மற்றும் சமூக உறவுகள் ஆகியவற்றின் மதிப்பைத் தொழில்நுட்பத்தின் அளவுகோல்களைக் கொண்டு மட்டுமே தீர்மானித்துவிட முடியாது.
இயந்திரங்கள் மனிதர்களைப் போலச் செயல்படத் தொடங்கியிருக்கும் இந்தக் காலகட்டத்தில், மனிதர்களாக இருப்பதன் தனித்துவம் என்ன என்ற கேள்வியை மீண்டும் உலகத்தின் முன் நிறுத்தியிருக்கிறது கேம்பிரிட்ஜ் அகராதியின் ‘Human’ தேர்வு.