பொதுவாகத் திருமணம் என்றாலே உறவினர்கள், நண்பர்கள், குடும்பத்தினர் எனப் பலரும் ஒன்றுகூடி மணமக்களை வாழ்த்துவது வழக்கம். ஆனால், சீனாவில் குடும்ப உறவுகளின் அரவணைப்பை இழந்து வளர்ந்த 24 வயது இளைஞர் ஒருவரின் திருமணத்திற்கு, அவருக்குத் தொடர்பில்லாத ஆயிரக்கணக்கான மக்கள் தாமாக முன்வந்து பங்கேற்ற சம்பவம் உலகளவில் கவனம் பெற்றுள்ளது.
தனது திருமணத்திற்கு அழைப்பதற்குப் போதுமான உறவினர்களோ நண்பர்களோ இல்லையே என்று கவலைப்பட்ட இளைஞர், சமூக வலைதளத்தில் விடுத்த ஓர் எளிய அழைப்புக்கு இவ்வளவு பெரிய வரவேற்பு கிடைக்கும் என்று எதிர்பார்க்கவில்லை. ஆனால், அவரது வாழ்க்கைப் பின்னணியை அறிந்த இணையவாசிகள், திருமணத்தில் பங்கேற்பதோடு மட்டுமல்லாமல், உணவு தயாரிப்பு முதல் திருமண ஏற்பாடுகள் வரை அனைத்திலும் தங்களது பங்களிப்பை வழங்கியுள்ளனர்.
சீனாவின் யுன்னான் மாகாணத்தில் உள்ள ஜாவோடோங் (Zhaotong) நகரின் யிலியாங் (Yiliang) கவுண்டியைச் சேர்ந்த சூ செங்ஹாங் (Xu Chenghong) என்ற இளைஞரின் திருமணத்தில்தான் இந்த நெகிழ்ச்சியான சம்பவம் நிகழ்ந்துள்ளது. அக்டோபர் 31-ஆம் தேதி நடைபெற்ற இந்தத் திருமணத்தில் 10,000-க்கும் மேற்பட்டோர் பங்கேற்றதாகப் பல்வேறு ஊடகச் செய்திகள் தெரிவிக்கின்றன. சில செய்திகளில் வருகையாளர்களின் எண்ணிக்கை சுமார் 20,000 எனவும் குறிப்பிடப்பட்டுள்ளது.
சிறுவயதிலேயே இழந்த குடும்ப உறவுகள்!
சூ செங்ஹாங்கின் வாழ்க்கை சிறுவயது முதலே பல்வேறு இழப்புகளைக் கொண்டதாக இருந்துள்ளது. அவருக்கு மூன்று வயதாக இருந்தபோது உடல்நலக் குறைவால் அவரது தந்தை உயிரிழந்துள்ளார். அவருக்கு ஐந்து வயதானபோது தாயார் மறுமணம் செய்துகொண்டு அவரைப் பிரிந்துள்ளார்.
இதையடுத்து, சூ செங்ஹாங்கையும் அவரது மூத்த சகோதரரையும் பாட்டி வளர்த்து வந்துள்ளார். ஆனால், இரண்டு ஆண்டுகளுக்குப் பிறகு பாட்டியும் உடல்நலக் குறைவால் உயிரிழந்துள்ளார். இதனால், சிறுவயதிலேயே பெற்றோர் மற்றும் பாட்டியின் அரவணைப்பை இழந்த இரு சகோதரர்களும் ஒருவருக்கொருவர் துணையாக வளர்ந்துள்ளனர்.
குடும்பத்தின் பொருளாதாரச் சூழல் காரணமாகச் சிறுவயதிலேயே வேலைக்குச் செல்ல வேண்டிய நிலை சூ செங்ஹாங்கிற்கு ஏற்பட்டுள்ளது. ஜவுளி ஆலைப் பணி, உணவுப் பொருட்கள் விற்பனை, பார்சல் விநியோகம் உள்ளிட்ட பல்வேறு வேலைகளில் ஈடுபட்டு தனது வாழ்க்கையைத் தானே கட்டமைத்துக்கொண்டுள்ளார்.
இவ்வாறு கிடைத்த வருமானத்தில் ஒரு பகுதியைச் சேமித்து வந்த அவர், தனது காதலியைத் திருமணம் செய்துகொள்வதற்காக நீண்டகாலமாகப் பணத்தைச் சேர்த்துள்ளார். ஊடகச் செய்திகளின்படி, சுமார் 1.67 லட்சம் சீன யுவான் (இந்திய மதிப்பில் சுமார் ரூ.21 லட்சம்) சேமித்திருந்ததாகக் கூறப்படுகிறது.
திருமணத்திற்கு வர யாருமில்லையே என்ற கவலை!
சூ செங்ஹாங்கும் அவரது காதலியும் இணையம் வாயிலாக அறிமுகமாகி, சுமார் மூன்று ஆண்டுகளாகக் காதலித்து வந்துள்ளனர். இருவரும் திருமணம் செய்துகொள்ள முடிவெடுத்த நிலையில், தனது வாழ்க்கையில் குடும்ப உறவுகளின் ஆதரவு இல்லாதது அவருக்குப் பெரும் கவலையாக இருந்துள்ளது.
திருமணத்திற்கு அழைப்பதற்குப் போதுமான உறவினர்களும் நண்பர்களும் இல்லாததால், திருமண நாளில் தங்களுடன் மகிழ்ச்சியைப் பகிர்ந்துகொள்ள யாரும் இருக்க மாட்டார்களோ என்று அவர் அஞ்சியுள்ளார். தனது வாழ்க்கையில் ஏற்கெனவே பல உறவுகளை இழந்திருந்த நிலையில், திருமணம் போன்ற முக்கியமான தருணத்தையும் தனிமையில் கடக்க வேண்டியிருக்குமோ என்ற எண்ணம் அவரை வருத்தமடையச் செய்துள்ளது.
இதையடுத்து, சீனாவின் பிரபல சமூக வலைதளமான டூயின் (Douyin) தளத்தில் அக்டோபர் 25-ஆம் தேதி காணொளி ஒன்றைப் பதிவிட்டுள்ளார். அதில் தனது குடும்பப் பின்னணியையும் திருமண ஏற்பாடுகள் குறித்த விவரங்களையும் பகிர்ந்துகொண்டு, இணையவாசிகள் தங்களது திருமணத்தில் பங்கேற்குமாறு அழைப்பு விடுத்துள்ளார்.
ஆரம்பத்தில் குறைந்தபட்சம் 10 முதல் 20 பேர் வரை வந்தால்கூடத் தனது திருமணம் மகிழ்ச்சியாக இருக்கும் என்று அவர் எதிர்பார்த்துள்ளார். ஆனால், அவரது காணொளி இணையத்தில் வேகமாகப் பரவியதையடுத்து, சீனாவின் பல்வேறு பகுதிகளில் இருந்தும் ஆயிரக்கணக்கானோர் திருமணத்தில் பங்கேற்க விருப்பம் தெரிவித்துள்ளனர்.
பரிசுகளுடன் குவிந்த மக்கள்!
சூ செங்ஹாங்கின் வாழ்க்கைப் பின்னணியை அறிந்த இணையவாசிகள், வெறுமனே வாழ்த்துகளைத் தெரிவிப்பதோடு நிற்கவில்லை. திருமணத்திற்குத் தேவையான பல்வேறு பொருட்களையும் பரிசுகளையும் கொண்டுவந்து தங்களது ஆதரவை வெளிப்படுத்தியுள்ளனர்.
சிலர் நீண்ட தூரம் பயணித்து நேரில் வந்து பங்கேற்றுள்ளனர். இன்னும் சிலர் திருமணப் பரிசுகளாகப் பன்றிகள், மாடுகள், கோழிகள், பழங்கள், குளிர்சாதனப் பெட்டிகள் உள்ளிட்டவற்றைக் கொண்டுவந்துள்ளனர். ஒரு நபர் மணமக்களுக்காக 9,999 ரோஜாக்களையும் ஏற்பாடு செய்துள்ளார்.
இந்தப் பரிசுகள் அனைத்தும் மணமக்களுக்கு மட்டுமல்லாமல், அவர்களின் வாழ்க்கையில் தங்களுக்கு அறிமுகமே இல்லாத ஆயிரக்கணக்கான மக்கள் காட்டிய அன்பின் வெளிப்பாடாகவும் அமைந்துள்ளன.
மேலும், திருமணத்திற்குத் தேவையான அலங்காரங்கள், உணவு ஏற்பாடுகள், மணமக்களுக்கான ஒப்பனை, போக்குவரத்து வசதிகள் உள்ளிட்ட பல்வேறு பணிகளிலும் தன்னார்வலர்கள் தங்களது பங்களிப்பை வழங்கியுள்ளனர். இதனால், ஒரு தனிப்பட்ட குடும்ப நிகழ்வாகத் தொடங்கிய திருமணம், ஒட்டுமொத்தப் பகுதியின் கொண்டாட்டமாக மாறியுள்ளது.
40-க்கும் மேற்பட்ட சமையல் கலைஞர்கள்; பல டன் உணவு தயாரிப்பு!
திருமணத்திற்கு எதிர்பாராத அளவிற்கு மக்கள் வரத் தொடங்கியதால், அவர்களுக்குத் தேவையான உணவு ஏற்பாடு மிகப்பெரிய சவாலாக மாறியுள்ளது. இதையடுத்து, சீனாவின் பல்வேறு பகுதிகளில் இருந்தும் 40-க்கும் மேற்பட்ட தொழில்முறை சமையல் கலைஞர்கள் தாமாக முன்வந்து திருமண நிகழ்வில் பங்கேற்றுள்ளனர்.
தங்களது சொந்தச் செலவிலேயே அங்கு வந்த அவர்கள், ஆயிரக்கணக்கானோருக்கு உணவு தயாரிக்கும் பணியில் ஈடுபட்டுள்ளனர். இதற்காகப் பெரிய அளவில் சமையல் கூடங்கள் அமைக்கப்பட்டு, பல குழுக்களாகப் பிரிந்து உணவு தயாரிக்கப்பட்டுள்ளது.
சமையல் பணிகளுக்காகப் பல்வேறு பொருட்களும் பொதுமக்களால் வழங்கப்பட்டுள்ளன. அக்டோபர் 29-ஆம் தேதி மட்டும் சுமார் இரண்டு டன் கோழி இறைச்சி பயன்படுத்தப்பட்டதாகச் சீன ஊடகச் செய்திகள் தெரிவிக்கின்றன.
திருமணத்திற்கு வருகை தரும் எவரும் உணவு கிடைக்காமல் திரும்பிச் சென்றுவிடக் கூடாது என்பதற்காகச் சமையல் கலைஞர்கள் தொடர்ந்து பணியாற்றியுள்ளனர். சமூக வலைதளத்தில் வெளியான ஒரு சாதாரண அழைப்பு, இத்தனை பெரிய அளவிலான தன்னார்வ உணவு ஏற்பாடுகளாக மாறியிருப்பது பலரது கவனத்தையும் ஈர்த்துள்ளது.
மக்கள் கூட்டத்தால் மாற்றப்பட்ட திருமண அரங்கம்!
ஆரம்பத்தில் திட்டமிடப்பட்டிருந்த திருமண ஏற்பாடுகள், எதிர்பாராத வகையில் ஆயிரக்கணக்கானோர் வருகை தந்ததால் போதுமானதாக இல்லாமல் போயின. இதனால், திருமண நிகழ்ச்சியைப் பெரிய இடத்திற்கு மாற்ற வேண்டிய சூழல் ஏற்பட்டுள்ளது.
உள்ளூர் மக்களும் தங்களால் இயன்ற உதவிகளைச் செய்துள்ளனர். திருமண நிகழ்வு நடைபெறும் பகுதிகளில் கூடுதல் மின்விளக்குகள் அமைத்தல், போக்குவரத்தைச் சீரமைத்தல் உள்ளிட்ட பணிகள் மேற்கொள்ளப்பட்டுள்ளன. அதிக எண்ணிக்கையிலான மக்கள் ஒரே நேரத்தில் இணையத்தைப் பயன்படுத்த வேண்டியிருக்கும் என்பதால், தொலைத்தொடர்பு நிறுவனமும் கூடுதல் 5G வசதிகளை ஏற்படுத்தியுள்ளது.
மக்கள் கூட்டம் தொடர்ந்து அதிகரித்ததால், உள்ளூர் நிர்வாகமும் இந்த நிகழ்வில் தலையிட்டு பாதுகாப்பு, போக்குவரத்து, வாகன நிறுத்துமிடம் மற்றும் கூட்டத்தைக் கட்டுப்படுத்துதல் உள்ளிட்ட பணிகளை ஒருங்கிணைத்துள்ளது.
மேலும், திருமணத்திற்கு வந்தவர்களால் அப்பகுதியில் உள்ள தங்கும் விடுதிகள் நிரம்பியதாகவும், உணவகங்களில் வியாபாரம் அதிகரித்ததாகவும் செய்திகள் வெளியாகியுள்ளன. இதனால், ஒரு சாதாரண இளைஞரின் திருமணம் அந்தப் பகுதியின் முக்கிய நிகழ்வாக மாறியுள்ளது.
மணமகளின் ஆதரவும் நெகிழ்ச்சியான பின்னணியும்!
இந்தத் திருமண நிகழ்வு குறித்து இணையத்தில் பல்வேறு கருத்துகள் பகிரப்பட்டு வரும் நிலையில், மணமகளின் ஆதரவும் கவனம் பெற்றுள்ளது.
தனது கணவரின் குடும்பப் பின்னணி குறித்து இருவரும் அறிமுகமான காலத்திலேயே தனக்குத் தெரியும் என்றும், அவரது கடந்தகால வாழ்க்கைச் சூழலைக் காரணமாகக் கொண்டு அவரை ஒருபோதும் ஒதுக்கவில்லை என்றும் மணமகள் தெரிவித்துள்ளார்.
தங்களது திருமணத்திற்கு இவ்வளவு பெரிய அளவில் மக்கள் வருகை தருவார்கள் என்று எதிர்பார்க்கவில்லை என்றும், தங்களுக்காக நேரம் ஒதுக்கிப் பயணம் செய்து வந்தவர்களின் அன்பும் உதவியும் நெகிழ்ச்சியளிப்பதாகவும் அவர் கூறியுள்ளார்.
இதற்கிடையில், இணையத்தில் இந்தத் திருமணம் திட்டமிட்டு நடத்தப்பட்டதா என்ற சந்தேகங்களும் எழுந்துள்ளன. ஆனால், மணமகனும் மணமகளும் அதனை மறுத்துள்ளனர். மேலும், இந்தச் சம்பவத்தின் மூலம் கிடைத்த கவனத்தைப் பயன்படுத்தி போலிக் கணக்குகள் உருவாக்கப்பட்டு வருவதாகவும் தகவல்கள் வெளியாகியுள்ளன.
உறவுகளைக் கடந்த மனிதநேயம்!
இன்றைய டிஜிட்டல் உலகில் சமூக வலைதளங்கள் பெரும்பாலும் பொழுதுபோக்கு, தகவல் பரிமாற்றம் மற்றும் தனிப்பட்ட கருத்துகளைப் பகிர்ந்துகொள்ளும் தளங்களாகவே பயன்படுத்தப்படுகின்றன. ஆனால், அவற்றின் வழியாக ஒருவரது தனிப்பட்ட வாழ்க்கையில் ஆயிரக்கணக்கான மனிதர்கள் நேரடியாகப் பங்கேற்று உதவ முடியும் என்பதற்கு இந்தச் சம்பவம் ஓர் எடுத்துக்காட்டாக அமைந்துள்ளது.
சிறுவயதிலேயே பெற்றோரையும் பாட்டியையும் இழந்து, குடும்ப உறவுகளின் துணையின்றி வளர்ந்த ஓர் இளைஞரின் வாழ்க்கையில் மகிழ்ச்சியான தருணம் அமைய வேண்டும் என்பதற்காகப் பலரும் தங்களது நேரம், உழைப்பு, பொருளாதார உதவி எனப் பலவற்றையும் வழங்கியுள்ளனர்.
தனது திருமணத்திற்கு 10 அல்லது 20 பேர் வந்தாலே போதும் என்று எதிர்பார்த்த இளைஞரின் அழைப்புக்கு, ஆயிரக்கணக்கானோர் நேரில் வந்து பதிலளித்துள்ளனர். உறவுகள் இல்லாத இடத்தில் மனிதநேயம் உறவாக மாறியிருக்கும் இந்தச் சம்பவம், குடும்பம் என்பது ரத்த உறவுகளால் மட்டுமே உருவாவதில்லை; அன்பு, அக்கறை, ஆதரவு ஆகியவற்றாலும் உருவாக முடியும் என்பதை உணர்த்துகிறது.
ஒரு மனிதனின் வாழ்க்கையில் மகிழ்ச்சியை ஏற்படுத்துவதற்கு அவருடன் பல ஆண்டுகளாகப் பழகியிருக்க வேண்டும் என்ற அவசியமில்லை. சில நேரங்களில், முன்பின் அறிமுகமில்லாத மனிதர்களின் சிறிய உதவிகள்கூட ஒருவரது வாழ்நாளில் மறக்க முடியாத நினைவாக மாறிவிடும் என்பதையே சீனாவில் நடைபெற்ற இந்தத் திருமணம் உலகிற்கு உணர்த்தியுள்ளது.
