அமெரிக்காவில் பணியாற்றும் வெளிநாட்டு ஊழியர்களுக்கு நிரந்தர குடியுரிமை பெறுவதற்கான முக்கிய நடைமுறையான நிரந்தர தொழிலாளர் சான்றிதழ் (PERM) திட்டத்தில் இருந்து, முன்னணி தொழில்நுட்ப நிறுவனங்களான காக்னிசென்ட், இன்ஃபோசிஸ், டாடா கன்சல்டன்சி சர்வீசஸ் (TCS), விப்ரோ மற்றும் ஹெச்சிஎல் டெக்னாலஜிஸ் உள்ளிட்ட நிறுவனங்களை அமெரிக்க தொழிலாளர் துறை இடைநிறுத்தியுள்ளது.
இந்த நடவடிக்கை அக்டோபர் 8, 2026 அன்று அறிவிக்கப்பட்டது. அமெரிக்க தொழிலாளர் துறை செயலாளர் கீத் சாண்டர்லிங் மற்றும் துணை அதிபர் ஜே.டி. வான்ஸ் ஆகியோர் இந்த அறிவிப்பை வெளியிட்டனர். கேப்ஜெமினி நிறுவனமும் இடைநிறுத்தப்பட்ட நிறுவனங்களின் பட்டியலில் இடம்பெற்றுள்ளது.இதனிடையே, மைக்ரோசாப்ட் மற்றும் அடோப் நிறுவனங்களும் மத்திய அரசின் விசாரணைகள் தொடர்பான காரணங்களால் தனியாக இடைநிறுத்தப்பட்டுள்ளதாக தெரிவிக்கப்பட்டுள்ளது.
நிரந்தர தொழிலாளர் சான்றிதழ் என்றால் என்ன?
நிரந்தர தொழிலாளர் சான்றிதழ் (PERM) என்பது அமெரிக்க தொழிலாளர் துறையின் கீழ் செயல்படும் முக்கிய தொழிலாளர் சான்றிதழ் நடைமுறையாகும்.
அமெரிக்காவில் பணியாற்றும் வெளிநாட்டு ஊழியரை நிரந்தரமாக பணியில் அமர்த்தி, அவருக்காக கிரீன் கார்டு பெறும் நடைமுறையைத் தொடங்கும் நிறுவனம், அந்தப் பணிக்கு தகுதியான அமெரிக்க தொழிலாளர் கிடைக்கவில்லை என்பதை பொதுவாக நிரூபிக்க வேண்டும்.
இந்த நடைமுறை நிறைவடைந்து PERM சான்றிதழ் அங்கீகரிக்கப்பட்ட பிறகு, சம்பந்தப்பட்ட ஊழியருக்கான வேலைவாய்ப்பு அடிப்படையிலான கிரீன் கார்டு விண்ணப்பத்தின் அடுத்த கட்டங்களை நிறுவனம் தொடர முடியும்.
புதிய விண்ணப்பங்களுக்கு என்ன நடக்கும்?
இடைநிறுத்தப்பட்ட நிறுவனங்களிடமிருந்து இனி புதிய நிரந்தர தொழிலாளர் சான்றிதழ் விண்ணப்பங்களை ஏற்காமல் இருப்பதுடன், ஏற்கனவே சமர்ப்பிக்கப்பட்டு நிலுவையில் உள்ள விண்ணப்பங்களின் செயல்முறையையும் அமெரிக்க தொழிலாளர் துறை நிறுத்தியுள்ளது.
இதன் காரணமாக, இந்த நிறுவனங்களில் பணியாற்றும் வெளிநாட்டு ஊழியர்களின் கிரீன் கார்டு பெறும் நடைமுறையில் தாமதம் ஏற்படக்கூடும்.
நடவடிக்கைக்கு காரணம் என்ன?
வெளிநாட்டு தொழிலாளர்களை பணியமர்த்துவது தொடர்பான அமெரிக்க திட்டங்கள் மீது அரசு தனது கண்காணிப்பை அதிகரித்துள்ள நிலையில், இந்த நடவடிக்கை மேற்கொள்ளப்பட்டுள்ளது.
வெளிநாட்டு தொழிலாளர் திட்டங்களை சில நிறுவனங்கள் பயன்படுத்தும் விதம், அமெரிக்க தொழிலாளர்களின் வேலைவாய்ப்பைப் பாதிக்கக்கூடும் என்ற குற்றச்சாட்டுகள் தொடர்பாகவும் அமெரிக்க அதிகாரிகள் கவனம் செலுத்தி வருகின்றனர்.
இந்திய ஐடி ஊழியர்களுக்கு பாதிப்பு ஏற்படுமா?
அமெரிக்காவில் பணியாற்றும் இந்திய ஐடி ஊழியர்களில், தங்கள் நிறுவனத்தின் ஆதரவுடன் கிரீன் கார்டு பெறும் நடைமுறையில் இருப்பவர்களுக்கு இந்த நடவடிக்கை கவலையை ஏற்படுத்தக்கூடும்.
குறிப்பாக, அவர்களின் விண்ணப்பம் PERM சான்றிதழ் கட்டத்தைச் சார்ந்திருந்தால், அந்தச் செயல்முறை தாமதமாகலாம். இதனால், அமெரிக்காவில் நிரந்தரமாகக் குடியேறுவதற்கான அவர்களின் திட்டத்திலும் நிச்சயமற்ற நிலை உருவாக வாய்ப்புள்ளது.
எச்-1பி விசா ரத்து செய்யப்படுமா?
நிரந்தர தொழிலாளர் சான்றிதழ் நடைமுறை இடைநிறுத்தப்பட்டுள்ளதால், சம்பந்தப்பட்ட நிறுவனங்களில் பணியாற்றும் ஊழியர்களின் ஏற்கனவே வழங்கப்பட்ட எச்-1பி விசாக்கள் தானாக ரத்து செய்யப்படாது.அதேபோல், ஏற்கனவே வழங்கப்பட்ட கிரீன் கார்டுகளும் இந்த நடவடிக்கையால் தானாக ரத்து செய்யப்படாது.
தற்போதைய நடவடிக்கை, குறிப்பிட்ட நிறுவனங்கள் மூலம் வேலைவாய்ப்பு அடிப்படையில் கிரீன் கார்டு பெறுவதற்கான நிரந்தர தொழிலாளர் சான்றிதழ் நடைமுறையை மட்டுமே நேரடியாகப் பாதிக்கிறது. இதனால், இந்தச் செயல்முறையை நம்பியிருக்கும் வெளிநாட்டு ஊழியர்களுக்கு தாமதமும், அடுத்தகட்ட நடவடிக்கைகள் குறித்த நிச்சயமற்ற நிலையும் ஏற்படக்கூடும்.
