உலக வரலாற்றிலே மிகப்பெரிய பயங்கரவாத தாக்குதல்களில் ஒன்றாகக் கருதப்படும் 9/11 தாக்குதல் நடைபெற்ற நாள் இன்று. 2001-ம் ஆண்டு செப்டம்பர் 11-ம் தேதி அமெரிக்காவின் நியூயார்க் நகரில் இருந்த உலக வர்த்தக மையத்தின் இரட்டை கோபுரங்கள் விமானங்கள் மோதி தீப்பற்றி எரிந்த சம்பவம் உலகையே அதிர்ச்சிக்குள்ளாக்கியது.
அன்று அமெரிக்காவில் 4 பயணிகள் விமானங்கள் பயங்கரவாதிகளால் கடத்தப்பட்டன. அவற்றில் இரண்டு விமானங்கள் நியூயார்க்கில் உள்ள உலக வர்த்தக மையத்தின் இரட்டை கோபுரங்கள் மீது மோதின. மற்றொரு விமானம் வாஷிங்டன் அருகே உள்ள பென்டகன் கட்டிடத்தின் மீது மோதியது. நான்காவது விமானமான United Airlines Flight 93, பயணிகள் மற்றும் விமானக் குழுவினர் கடத்தல்காரர்களை எதிர்த்து போராடிய நிலையில், பென்சில்வேனியாவில் உள்ள ஒரு வயல்வெளியில் விழுந்து நொறுங்கியது.
உள்ளூர் நேரப்படி காலை 8.46 மணிக்கு, American Airlines Flight 11, உலக வர்த்தக மையத்தின் வடக்கு கோபுரத்தில் மோதியது. சுமார் 17 நிமிடங்களுக்குப் பிறகு, காலை 9.03 மணிக்கு, United Airlines Flight 175 தெற்கு கோபுரத்தில் மோதியது. அடுத்ததாக காலை 9.37 மணிக்கு American Airlines Flight 77 பென்டகன் மீது மோதியது. காலை 10.03 மணிக்கு Flight 93 பென்சில்வேனியாவில் விழுந்தது.
விமானங்கள் மோதியதைத் தொடர்ந்து உலக வர்த்தக மையத்தின் இரு கோபுரங்களிலும் தீப்பற்றி, கரும்புகை சூழ்ந்த நிலையில் முதலில் தெற்கு கோபுரமும், பின்னர் வடக்கு கோபுரமும் இடிந்து விழுந்தன. இந்த தாக்குதல்களில் மொத்தம் 2,976 பேர் உயிரிழந்தனர். உயிரிழந்தவர்களில் பல்வேறு நாடுகளைச் சேர்ந்தவர்களும் இருந்தனர். ஆயிரக்கணக்கானோர் காயமடைந்தனர்.
இந்த தாக்குதல் அல்-கொய்தா அமைப்பைச் சேர்ந்த 19 பேரால் நடத்தப்பட்டதாக அமெரிக்க புலனாய்வு அமைப்பான FBI தெரிவித்துள்ளது. இந்த சம்பவத்துக்குப் பின்னர் அமெரிக்காவின் உள்நாட்டு பாதுகாப்பு மற்றும் பயங்கரவாத எதிர்ப்பு நடவடிக்கைகளில் மிகப்பெரிய மாற்றங்கள் ஏற்பட்டன.
9/11 தாக்குதல் அமெரிக்காவை மட்டுமின்றி உலக நாடுகளின் பாதுகாப்பு மற்றும் பயங்கரவாத எதிர்ப்பு கொள்கைகளிலும் நீண்டகால தாக்கத்தை ஏற்படுத்தியது. அந்த ஒரு நாள், உலக அரசியல் மற்றும் பாதுகாப்பு வரலாற்றில் ஒரு முக்கிய திருப்புமுனையாக மாறியது. 24 ஆண்டுகளுக்குப் பிறகும், 2001 செப்டம்பர் 11 அன்று நடந்த அந்த சம்பவம் உலக வரலாற்றில் அழியாத சுவடாகவே உள்ளது.
