எம்ஜிஆரால் 1972, அக்டோபர் 17-ஆம் தேதி தொடங்கப்பட்ட அதிமுகவில் 25 வயது இளைஞராக ஈராட்டில் இருந்து சேர்ந்து, அடுத்தப் பொதுச் செயலர் ஜெயலலிதாவின் விசுவாசியாகப் பல்வேறு அமைச்சர் பதவிகளை வகித்து, ஒன்றுபட்ட அதிமுகவை உருவாக்க குரல் கொடுத்து தோல்வியடைந்து நடிகர் விஜயின் தமிழக வெற்றிக் கழகத்தில் ஐக்கியமாகி உள்ளார் கே.ஏ. செங்கோட்டையன்.
மூத்த அரசியல்வாதி..
50 ஆண்டுகாலம் அதிமுகவில் இருந்த செங்கோட்டையனின் அனுபவம் தவெகாவுக்கு மேலும் பலத்தை ஏற்படுத்துமா அல்லது பலவீனத்தை ஏற்படுத்துமா என்று பார்க்கலாம். சத்தியமங்கலத்திலிருந்து 1977-இல் முதல் முறை எம்எல்ஏவாகத் தேர்வாகிய கே.ஏ.செங்கோட்டையன் அதன் பின்னர்க் கோப்பிச்செட்டிபாலத்திலிருந்து 8 முறை எம்.எல்.ஏ. பதவியை வகித்துள்ளார். உடல் நலமின்றி முதல்வர் ஜெயலலிதா அப்பல்லோ மருத்துவமனையில் சிகிச்சைப் பெற்று வந்தபோதும், அவரது தோழி சசிகலாவுக்கும், முன்னாள் முதல்வர் பன்னீர்செல்வத்துக்கும் பக்க பலமாய் நின்று ஆட்சியைத் தக்க வைக்க உதவியர்.
கூவத்தூர் பங்களாவில் அதிமுக எம்எல்ஏக்களை ஒருங்கிணைத்து கட்சியைக் கட்டுப்பாட்டுகள் கொண்டு வருவதிலும் பெரும் பங்கு வகித்தார்.
எடப்பாடியை அடையாளம் காட்டியவர்..
ஜெயலலிதா மறைவுக்குப் பிறகு சசிகாலவின் முதல் விசுவாசியாக இருந்த செங்கோட்டையன் தனக்கு வந்த முதல்வர் பதவி வாய்ப்பை, தன்னால் அடையாளம் காணப்பட்ட எடப்பாடி பழனிசாமிக்கு வழங்கினார். பின்னர் எடப்பாடியால் கட்சியில் இருந்து வெளியேற்றப்பட்ட சசிகலா, டிடிவி தினகரன், ஓ பின்னீர் செல்வம் ஆகியோரை மீண்டும் இணைத்து ஒருங்கிணைந்த அதிமுகவாக்க வேண்டும் என்று கடந்த செப்டம்பர் 5 அக்கட்சியின் பொதுச் செயலாளரான எடப்பாடி பழனிச்சாமிக்கு பத்து நாட்கள் கெடுவிதித்தார்.
இதற்குப் பாஜகவும் ஆதரவு தெரிவிக்கும் வகையில் அவரை அழைத்துத் தில்லியில் பேசியது. ஆனால், அதிமுகத் தலைமைக்கு எதிராகச் செயல்பட்டதாகக் கூறி செங்கோட்டையனின் கழக அமைப்புச் செயலாளர், ஈரோடு புறநகர் மேற்கு மாவட்டக் கழகச் செயலாளர் பொறுப்புகளும் அவரிடமிருந்து பறிக்கப்பட்டுக் கட்சியிலிருந்து நீக்கப்பட்டார்.
பின்னர் நவம்பர் 26ம் தேதி தனது எம்எல்ஏ பதவியைக் காலையில் ராஜிநாமா செய்தார்.
தவெகவில் இணைப்பு..
செங்கோட்டையனை திமுகவில் இணைக்க அமைச்சர் சேகர் பாபு மேற்கொண்ட முயற்சிகள் தோல்வியடைந்தன. அன்றைய தினமே விஜயை சந்தித்து இரண்டு மணி நேரம் ஆலோசனை நடத்தினார். நவம்பர் 27-ம் தேதி விஜய் முன்னிலையில் தவெகாவில் இணைந்தார் செங்கோட்டையன்.
அதிமுகவில் இருந்து நீக்கப்பட்ட ஓ பன்னீர்செல்வத்தைபோல் சட்டப்போராட்டம், தர்மயுத்தம் என எதையும் நிகழ்த்தாமல், அக்டோபர் 31-ம் தேதி நீக்கப்பட்டவுடன் ஒரே மாதத்தில் மாற்றுக் கட்சியான தவெகாவில் இணைந்துள்ளார் செங்கோட்டையன். அவருடன் முன்னாள் அதிமுக முன்னாள் எம்பி சத்தியபாமாவும் ஆதரவாளர்களுடன் இணைந்துள்ளார்.
புதிதாகத் தொடங்கப்பட்ட தவெகவில் அனுபவமிக்கத் தலைவர்கள் இல்லை என்பதுதான் பெரும் விமர்சனமாக இருந்தது. நடிகர் விஜயகாந் தேமுதிக தொடங்கியபோது எம்ஜிஆர், ஜெயலலிதா ஆகியோருடன் இருந்த பழுத்த அரசியல்வாதி பண்ருட்டி ராமச்சந்திரனுக்கு அவை தலைவர் எனும் பெரும் பதவியை வழங்கி சேர்த்தார்.
கருப்பு எம்ஜியாராக விஜயகாந்த்தை அடையாளப்படுத்திக் கட்சித் தொடங்கிய குறுகிய காலத்தில் எதிர்க்கட்சி தலைவர் வரை உயர்த்தினார் பண்ருட்டி ராமச்சந்திரன்.
இந்தப் பாணியில்தான் தற்போது விஜய், செங்கோட்டையனை தவெகாவில் இணைத்துள்ளார்.
தலைமை ஒருங்கிணைப்பாளர் பதவி..
கட்சித் தொடங்கி ஒன்றரை ஆண்டுகள் வரையில் பழைய அரசியல்வாதிகளைச் சேர்க்காமல் கட்டுக்கோப்புடன் இருந்த விஜய் முதல் முறையாக மூத்த அரசியல்வாதி செங்கோட்டையனுக்குத் தலைமை ஒருங்கிணைப்பாளர் பதவியை வழங்கி உள்ளார்.
இதற்குக் கரூர் பேரணியில் 41 பேர் உயிரிழக்க நேரிடட் சம்பவமும் ஒரு காரணமாக அமைந்துள்ளது. விஜயின் பிரச்சாரக் கூட்டங்களைச் சரிவரத் திட்டமிடாததும் கரூர் சம்பவத்தில் குற்றம்சாட்டப்பட்டது. ஜெயலலிதாவின் தேர்தல் சுற்றுப் பயணத்திட்டத்தைத் துல்லியமாகத் தயாரித்து அதற்கான ஏற்பாடுகளைக் களத்தில் சென்று ஆய்வு செய்து உறுதிப்படுவத்துவதில் செங்கோட்டையன் வல்லவர். இதனால் விஜயின் சுற்றுப் பயணத்திட்டம், மேடை அமைப்பு, தொண்டர்களின் பாதுகாப்பு அம்சங்கள் ஆகியவற்றை முன்கூட்டியே திட்டமிட்டு ஒருங்கிணைக்கும் பொறுப்பு இனி அனுபவமிக்கச் செங்கோட்டையிடம் வழங்கப்படலாம்.
விஜயை புஸ்ஸி ஆனந்த், ஆதவ் அர்ஜுனா, ஜான் ஆரோக்கியசாமி ஆகியோரால் மட்டும் எளிதில் அனுக முடிகிறது. இந்தப் பட்டியில் தற்போது மூத்த அரசியல்வாதி செங்கோட்டையனும் இணைந்தால், கூட்டணி பேச்சு, அதிருப்தி தலைவர்களை இணைத்து தவெகாவுக்குப் பலத்தைச் சேர்ப்பார். செங்கோட்டையனின் வெளியேற்றம் அதிமுகவுக்குக் கொங்கு மண்டலத்தில் பலவீனத்தை ஏற்படுத்தும்.
சினிமா ரசிகர்களான இளைஞர்கள், நடுத்தர வயதினரின் செல்வாக்கை செல்லும் வாக்குகளாகவும், ஆளும் திமுக அரசின் மீதுள்ள அதிருப்தி வாக்குகளைத் தவெகாவின் வாக்குகளாகவும் மாற்றும் தந்திரத்தையும் விஜய்க்கு செங்கோட்டையன் வரும்நாள்களில் அளிப்பார் என்றே எதிர்பார்க்கப்படுகிறது.
