பிகார் தேர்தல் வாக்குறுதிகள் வாக்குகளாக மாறுமா?

பிகாரில் சட்டப்பேரவைத் தேர்தலில் வெற்றி பெற்று ஆட்சியைத் தக்க வைத்து கொள்ள முதல்வர் நிதீஷ் குமார் தலைமையிலான தேசிய ஜனயநாகக் கூட்டணியும், முன்னாள் மத்திய அமைச்சர் லாலு பிரசாத் யாதவின் மகனும் ராஷ்ட்ரிய ஜனதா தளக் கட்சியின் தலைவருமான தேஜஸ்வி யாதவின் தலைமையிலான மகாகட்பந்தனும் வாக்குறுதிகளை அள்ளி வீசியுள்ளன.
இந்த வாக்குறுதிகள் வாக்குகளாக மாறுமா என்பதைப் பார்ப்போம்.
243 தொகுதிகளை கொண்ட பிகார் மாநில சட்டப்பேரவைக்கு நவம்பர் 6 மற்றும் 11-ஆம் தேதிகளில் வாக்குப்பதிவு நடைபெறுகிறது.
இதில், மகாகட்பந்தனில் காங்கிரஸ், இடதுசாரிகள், விகாஸ்ஷீல் இன்சான் கட்சிகள் இடம்பெற்றுள்ளன. இக்கூட்டணியின் முதல்வர் வேட்பாளராக தேஜஸ்வி யாதவும், துணை முதல்வராக மீனவ சமுகத்தைச் சேர்ந்த விகாஸ்ஷீல் இன்சான் கட்சியின் தலைவர் முகேஷ் சஹானியும் அறிவிக்கப்பட்டுள்ளனர். 

 இந்தக் கூட்டணியின் தேர்தல் வாக்குறுதிகள்:

•  ஆட்சிக்கு வந்த 20 நாட்களுக்குள் குடும்பத்தில் ஒருவருக்கு அரசு வேலை
• அரசு ஊழியர்களுக்கு பழைய ஓய்வூதியத் திட்டம் மீண்டும் அமல்படுத்தப்படும்
• வக்ஃப் திருத்த சட்டம் ரத்து செய்யப்படும்
• ‘கள்ளு’க்கடைகள் திறக்கப்படும்
• மாதந்தோறும் 200 யூனிட் இலவச மின்சாரம்
• பட்டப்படிப்பு வரை இலவச கல்வி; அனைத்துக் கல்லுாரி மாணவர்களுக்கும் இலவச லேப் – டாப்
• சிறு, குறு விவசாயிகளின் கடன் தள்ளுபடி; பாசனத்திற்கு இலவச மின்சாரம்
• குடும்பத்திற்கு 10 லட்சம் ரூபாய் வரை இலவச மருத்துவக் காப்பீடு
• அரசு வேலைகளில் பெண்களுக்கு 33 சதவீத இட ஒதுக்கீடு
• உள்ளாட்சிகளில் பிற்படுத்தப்பட்ட சமூகத்திற்கு இருக்கும் 30% இட ஒதுக்கீடு என பல்வேறு வாக்குறுதிகள் அளிக்கப்பட்டுள்ளன.

• தேசிய ஜனநாயக கூட்டணி வாக்குறுதிகள்:
• முதல்வர் நிதிஷ் குமாரின் ஐக்கிய ஜனதா தளம், பாஜக, லோக் ஜனசக்தி, ஹிந்துஸ்தான் அவாம் மோர்ச்சா, ராஷ்டிரிய லோக் மோர்ச்சா ஆகிய கட்சிகள் தேசிய ஜனநாயகக் கூட்டணியில் இடம்பெற்றுள்ளன. அக்கூட்டணியின் வாக்குறுதிகள்…
• ஆட்சி அமைத்த 20 நாட்களுக்குள் 1 கோடி இளைஞர்களுக்கு அரசு வேலை உத்தரவாதம்.
• 125 யூனிட் இலவச மின்சாரம் வழங்கப்படும்.
• பெண்களுக்கு மாதந்தோறும் ரூ.2,500 நிதி உதவியும், அடுத்த 5 ஆண்டுகளுக்கு ஆண்டிற்கு ரூ.30,000 வழங்கப்படும்.
• பழைய ஓய்வூதியத் திட்டம் நடைமுறைப்படுத்தப்படும்
• ஐ.டி பூங்காக்கள், சிறப்புப் பொருளாதார மண்டலங்கள், உணவுப் பதப்படுத்துதல், சுற்றுலா உள்ளிட்ட துறைகளில் வேலைவாய்ப்புகள் உருவாக்கப்படும்.
• ஐந்து புதிய விரைவுச் சாலைகள் கட்டப்படும்
• விவசாயிகளுக்கு ரூ.9 ஆயிரம் உதவித் தொகை.
• சீதை பிறந்த இடம் ‘சீதாபுரம்’ என்று ஆன்மிக நகரம் உருவாக்கப்படும் என முக்கிய வாக்குறுதிகள் அளிக்கப்பட்டுள்ளன.

மகாகட்பந்தன் கூட்டணியை ஜாமினில் வெளியே வந்துள்ள கொள்ளை கூட்டணி என பிரதமர் மோடி விமர்சித்து தேர்தல் பிரச்சாரத்தை மேற்கொண்டார். மேலும், எதிர்க்கட்சிகள் அளித்த குடும்பத்தில் ஒருவருக்கு அரசு வேலை வாக்குறுதியை நிறைவேற்ற பிகாரின் பட்ஜெட் போதுமானதாக இருக்காது என்றும் பாஜக விமர்சித்து வந்தது.
ஆனால், தேர்தல் இலவசங்களுக்கு எதிர்ப்பு தெரிவித்து வரும் பாஜகவே பிகார் தேர்தலில் ஏராளமான இலவச திட்டங்களை தேர்தல் வாக்குறுதிகளாக அறிவித்துள்ளது. 1 கோடி இளைஞர்களுக்கு அரசு வேலை என்ற எதிர்க்கட்சிகளின் பார்முலாவையே பின்பற்றி வாக்குறுதிகளை அளித்துள்ளது.
அதுமட்டுமல்லாமல் தேர்தல் அறிவிப்பு வெளியாகும் சில தினங்களுக்கு முன்பு 75 ஆயிரம் பெண்களுக்கு ரூ.10 ஆயிரம் நிதி உதவி அளிக்கும் திட்டத்தை பிகாரில் பிரதமர் மோடியே தொடங்கி வைத்தார். இத்திட்டத்தில் பெண்களுக்கு ரூ.2 லட்சம் வரை தொடர் நிதி உதவி அளிக்கப்படும் என்றும் வாக்குறுதி அளிக்கப்பட்டுள்ளது.

இதற்கு மறுபுறம் மகாகட்பந்தனில் இடம்பெற்றுள்ள காங்கிரஸ் மூத்த தலைவர் ராகுல் காந்தி வாக்குத் திருட்டை முன்வைத்து பிகாரின் பல பகுதிகளில் வாக்குரிமை பேரணியை நடத்தி பிரசாரம் செய்துள்ளார்.

மேலும், இந்தியா – பாகிஸ்தான் பேரை நிறுத்தியாக கூறும் அமெரிக்க அதிபர் டிரம்புக்கு எதிராக பேச துணிவில்லாதவர் பிரதமர் மோடியை என ராகுல் பிரதமரின் பலவீனத்தை வைத்து பிரசாரம் செய்து வருகிறார்.
பிகார் தேர்தல் களம் சூடுபிடித்துள்ளநிலையில், ஆளும் பாஜக கூட்டணியின் வாக்குறுதிகளை நம்பி மக்கள் வாக்களித்து 20 ஆண்டுகால முதல்வர் நிதிஷின் முதல்வர் கணக்கை கூட்டுவார்களா அல்லது எதிர்க்கட்சிகளின் வாக்குறுதிகளை நம்பி தேஜஸ்விக்கு முதல்வர் பதவியை வழங்கி அவரது முதல்வர் கனவை நனவாக்குவார்களா என்பது நவம்பர் 14-ஆம் தேதி வாக்கு எண்ணிக்கையின்போது விடை கிடைத்துவிடும்.