இயக்குனர் பிரவீன் கே இயக்கத்தில் விஷ்ணு விஷால், ஸ்ரத்தா ஸ்ரீநாத் மற்றும் செல்வராகவன் நடிப்பில் வெளியாகியுள்ள திரைப்படம் ‘Aaryan’ . திரைப்படத்தின் கதையில், செல்வராகவன் ஒரு தோல்வியடைந்த எழுத்தாளராக நடித்துள்ளார். அவர் ஒரு பெரிய தொலைக்காட்சி சேனலில் நேரலையில் (Live show) தோன்றி, “நான் ஒரு சீரியல் கில்லர் — அடுத்த ஐந்து நாட்களில் ஐந்து பேரைக் கொலை செய்வேன். ஆரம்பம் என் தற்கொலையிலிருந்துதான்,” என்று கூறி, அதே நேரலையில் தற்கொலை செய்து கொள்கிறார். ஆனால் பின்னர், அவர் சொன்னபடி கொலைகள் நடக்கத் தொடங்குகின்றன! அவர் உண்மையிலேயே உயிருடன் இருக்கிறாரா? அல்லது வேறு யாராவது இந்தக் கொலைகளைச் செய்கிறார்களா? இந்த மர்மத்தைத் தீர்க்கும் விஷ்ணு விஷால் ஒரு போலீஸ் அதிகாரியாகக் களமிறங்குகிறார்.
‘அடுத்து என்ன நடக்கப்போகிறது?’ என்று படம் ஆரம்பம் முதல் இறுதி வரை வேகமாக நகர்கிறது. இசையமைப்பாளர் ஜிப்ரான் தனது ராட்சசன் பாணியை மீண்டும் கொண்டு வரவில்லை என்றாலும், “ஆரியன்” கதைக்கேற்ற விதமாகப் பிணைக்கும் பின்னணி இசையைக் கொடுத்துள்ளார். ஒளிப்பதிவு மற்றும் எடிட்டிங் பகுதிகளில் சிறந்த தொழில்நுட்பத் தரம் காக்கப்பட்டுள்ளது. செல்வராகவன் ‘சைக்கோபாத்’ எழுத்தாளராகக் காட்சியளித்த விதம் ரசிகர்களிடையே பெரும் ஈர்ப்பை ஏற்படுத்தியுள்ளது. “இந்த உலகத்துல நீ எங்க தேடினாலும், நான் உனக்குக் கிடைக்க மாட்டேன்…” என்ற அவரது டயலாக், படம் முழுவதும் பின்தொடரும் ஒரு தத்துவப் புள்ளியாக மாறுகிறது.
ஆனால், சில குறைகள் தவிர்க்க முடியாதவை — குறிப்பாக விஷ்ணு விஷாலின் லுக் மற்றும் இறுதியில் கொலைக்கான காரணத்தில் உள்ள உணர்ச்சி கனெக்ஷன்களின் குறைபாடு. அதனையும் மீறி படம் ஒரு வலுவான திரில்லர் அனுபவத்தை வழங்குகிறது. விஷ்ணு விஷால் மீண்டும் ஒரு திரில்லரில் தன் கையெழுத்தை காட்டியுள்ளார். ‘Aaryan’ படம் பார்வையாளர்களின் மனதில் சிந்தனையை ஏற்படுத்தும் வகையில் நிறைவடைகிறது. ஆகமொத்தத்தில் ‘Aaryan’ படத்திற்கு 3.8/5 மதிப்பெண் வழங்கலாம்.
